Recuperacion di beneficio AOV paga sin derecho pa SVb a wordo maneha di forma inapropia

Segun Raport di Ombudsman

*SVb a comete un eror administrativo

*Peticionario a ricibi pensioen di mas 

ORANJESTAD (AAN):   Ombudsman di Aruba a publica un raport caminda nan ta referi na e siguiente caso: recuperacion di beneficio AOV paga sin derecho pa SVb a wordo maneha di forma inapropia– e keho ta funda pa gran parti Ombudsman a investiga un keho di un pensionado cu, pa motibo di un eror di e Sociale Verzekeringsbank (SVb), a ricibi un beneficio di AOV (Algemene Ouderdomsverzekering) mas halto cu e tabata tin derecho riba dje durante un periodo di tres aña.

Na 2018, SVb a comete un eror administrativo cu a resulta den un ahuste pa loke ta trata e suma di AOV-uitkering (pensioen di biehes) no a wordo corectamente procesa. Como consecuencia, entre november 2018 y november 2021, e peticionario a ricibi mensualmente mas pensioen di biehes cu e tabata tin derecho riba dje. Ora e eror a wordo descubri, SVb a dicidi di cobra e suma cu reclamante a ricibi di mas. Na momento cu e eror a wordo identifica, e reclamante a ricibi mas cu Afl. 30.000 di mas.

Ombudsman a conclui cu SVb tabata tin legalmente e derecho pa cobra e sumanan cu reclamente a ricibi, sin embargo, e manera cu SVb a cobra e suma di placa tabata den varios aspecto contra normanan di conducta apropia. 

Conducta inapropia

Ombudsman a determina cu SVb no tabata tin controlnan suficiente pa detecta y coregi e eror na tempo. Ademas, reclamante a wordo informa di su obligacion pa paga e suma bek despues cu SVb ya a cuminsa cu deduccion riba su pensioen di biehes.

Tambe SVb a haci deduccion riba e pensioen di reclamante sin emiti un decision administrativo formal prome. SVb tampoco a informa e reclamante tocante su derechonan pa pidi reconsideracion di e decision of di apelacion.

Ademas, SVb a uza un declaracion di debe (schuldbeketenis) cual tabata encera un areglo di pago, gastonan, interes y boet a base di ley civil, en bes di sigui e procedura administrativo regular.

Apesar di tur esaki reclamante a entrega un peticion na SVb mes pa reconsidera nan desicion, y esaki no a wordo trata na forma corecto door di SVb tampoco.

Adicional SVb no a coopera cu e peticion di reclamante pa coregi e declaracion di entrada anual pa loke ta trata e añanan den cual e a ricibi pago dimas pa su pensioen di biehes. Door di esaki reclamante no por a pidi Servicio di impuesto pa haci un coreccion.

Como resultado, reclamante a haye confronta cu un debe considerabel, deduccionnan riba su pension di biehes y problema fiscal debi na un eror cu no tabata su falta. 

Parti di keho infunda

Ombudsman a constata cu reclamante a ricibi mensualmente hopi mas pensioen di biehes cu e tabata tin derecho riba dje. Conforme e Landsverordening Algemene Ouderdomsverzekering (LAOV), SVb tin e autoridad legal pa recobra e sumanan aki. Pa e motibo ey, e keho tocante e derecho di SVb pa recobra e pagonan paga di mas, ta infunda.

E critica di Ombudsman no ta dirigi contra e cobransa mes, sino contra e manera cu SVb a maneha e eror y e consecuencianan di esaki pa e reclamante.

Ombudsman a conclui cu SVb a actua contra e prinsipionan di:

-Tene cuenta cu tur interes

- Eficaz

- Siguridad huridico

- Transparencia

- Hunga limpi (Fair play)

- Informacion adecua

- Trato respetuoso

- Derecho pa wordo scucha

- Profesionalismo

- Conducta rasonabel

Recomendacion

Ombudsman a haci varios recomendacion na SVb pa preveni cu situacionnan similar bolbe sosode den futuro. E recomendacionnan aki ta enfoca riba mehoracion di controlnan interno, comunicacion i proteccion huridico, pero tambe riba un manera di traha pa tene mas cuenta cu e individual ora cu erornan di SVb ta causa daño na ciudadanonan.

Ombudsman ta di opinion cu, den casonan manera esaki, SVb mester coopera activamente pa limita y remedia e consecuencianan pa e personanan afecta, pa asina evita cu e carga di un eror gubernamental wordo poni di manera desproporcional riba e ciudadano.

Ademas, Ombudsman a recomenda SVb pa haci ehecucion solamente por medio di decisionnan administrativo formal, reforsa su controlnan interno y investiga si compensacion of un pordon parcial di debe por ta adecua den cierto situacionnan.