The content originally appeared on:
Diario
ORANJESTAD (AAN): Un rapport nobo di 2024 di e carchi di credito Mastercard, a conclui cu awendia esnan cu ta planea nan vacantie,
ta poniendo prioridad na eventonan, tambe destinacionnan menos costoso, y viahenan mas largo den climanan cu tempo calor pa verano aki.
E informe suministra pa Mastercard Economics Institute, ta agrega sinembargo cu e viaheronan ta mas determina cu nunca pa sigui viaha, hasta awor cu prijsnan a subi y cu tin inflacion tur caminda.
Esnan cu ta biba na Europa y Asia, sinembargo ta pone prioridad na “balor pa nan placa” ora di tuma decision.
Mastercard a detecta cu Munich ta na e top di lista di destinacionnan hopi busca pa verano aki. Esaki ta bin aparentemente debi na eventonan grandi cu ta planea eynan, incluyendo e Eurocup 2024 di UEFA, y tambe un concierto di Taylor Swift. Adele tambe lo tey na Munich pa un concierto na Augustus.
Tokyo tey na puesto #2 di top destinacion cu ta trending, y aki e Yen debil ta yudando aumenta demanda awor cu pandemia no tey mas. Japon ta hayando hopi mas bishitante cu normal, y na Maart so a ricibi 3 miyon bishitante.
Tirana, cu ta e ciudad capital di Albania, ta na #3 riba e list di trending. Mastercard a compronde di encuestanan, cu prijsnan abao na Albania ta e forza principal pakico e ta atractivo. Y hotelnan na oriya di lama ta djis un careda chikito for di Tirana International Airport.
Destinacionnan cu beach ta popular e verano aki, cu viaheronan escogiendo Francia, Grecia, Mexico, Zuidoost Asia, y Caribe pa lugar pa bay goza di lama y beach. Mastercard a descubri cu viaheronan Mericano lo bay keda mas cerca di e region pa nan vakantie na beach, y e rapport ta mustra cu tin demanda grandi pa Cancun y Aruba.
Viaheronan ta tuma vakantienan mas largo tambe na destinacionnan cu no ta cara, y esaki ta socede na lugarnan unda clima ta mas calor y nada frieu.
