The content originally appeared on:
Diario
Keho oficial entrega contra Alberto Groeneveldt
Tur intento pa salba e cacho tabata envano
ORANJESTAD (AAN): Tabata siman pasa cu Ministerio di Transporte, Integridad, Naturalesa, y Cuido di Anciano (TINO) cu ta cay bao di Minister Ursell Arends a bati alarma riba un situacion di Abuso Extremo di mascota cu a wordo detecta na Aruba.
Un pober cacho di rasa Chihuahua kende recien a caba di werp varios puppies, a wordo mara pafo di cas cu cadena rond di su curpa comosifuera ta un animal peligroso di atake e ta. Asina pa basta siman, e cacho tefi aki cu e nomber “Khaleesi” a keda mara y habitantenan eybanda na San Barbola a cuminsa bati alarma na instancianan cu ta proteha cacho. Esaki a yega na oido di e.o. Luna Foundation, cu a purba papia cu e doño pero e no kier razona.
Finalmente siman pasa, ta e grupo respeta di ‘Crijojo Trappers’ a yega y no por a kere nan wowo. Nan a graba un video ora cu nan a bay corta e cadena y cabuya y por a mira cu e animal hopi debil ainda tabata dunando lechi na puppies.
E cadena y cabuya aki tabata asina fuerte mara rond di su nek, te cu esaki a cuminsa literalmente “corta” den cuero di e animal, y esaki a cuminsa habri na herida cu carni bibo te cu por a mira su weso. Tabatin señal di infeccion fuerte caba, y mas señal di maltrato. E potretnan ta indica e gravedad di e heridanan rond di su nek. Ta comosifuera cu djis un tiki mas, y e cabuya y cadenanan aki lo a decapita e animal.
Cu yudansa di Luna Foundation, a core hiba e pober cacho aki pa Veterinario Contreras cu mesora a cuminsa pa haci e herida limpi, duna antibiotica, y duna tratamento. Luna Foundation na su turno a cuminsa cuida pa e puppies pa sigui ricibi alimento necesario.
Ora cu e informacion a cuminsa circula, ta hopi hende a keda biba di cerca e miseria cu e cacho chikito aki tabata pasa aden. A logra di trata e heridanan na su nek y demas parti di su curpa, pero e cacho tabata basta debil. A cuminsa yude den e proceso di recuperacion, aunke su estado tabata critico.
Asina fin di siman a drenta, y keto bay e tabata recuperando y tabata parce di lo ta ricibiendo un tiki mehoramento.
Sinembargo Diadomingo e informe tristo a drenta cu e cacho “Khaleesi” a muri, debi na e cu e tabata demasiado debil di heridanan pisa cu el a sufri di e maltrato aki.
E lucha cu e boluntarionan a hiba pa trata di salba bida di Khaleesi tabata demasiado laat. Publico a hasta cuminsa puntra pakico humanidad ta birando asina? Si acaso bo no por cuida un cacho, pakico bo a busca uno anto?
Ministerio Publico: Fundacion oficialmente a entrega denuncia na Polis di loke a socede. Awor e caso a wordo pusha den man di Ministerio Publico, pa mira si acaso Fiscal lo bay tuma decision contra e caso extremo di abuso di animal aki. E doño a resulta di ta e conocido Alberto Groeneveldt, kende ta fungi awor como Wedding Planner na Aruba pa bishitantenan.
Ademas, Groeneveldt den ultimo eleccion na 2021 a aparece riba lista di Partido MAS tambe y a core campaña.
Publico den fin di siman a expresa nan disgusto total pa loke e homber a haci cu e pober cacho, te cu el a neglish’e di e forma extremo aki. Y tur hende ta aprecia hopi e intento di Luna Foundation y tambe Crijojo Trappers pa trata di rescat’e.
Publico inconsolable: Por a sinti den fin di siman, cu publico tin confiansa cu Ministerio Publico, y despues tambe Huez den Corte di Husticia lo actua severamente contra e actitud di Groeneveldt. Loke el a haci, simplemente ta parce cu pa hopi hende e no por ni bay pidi “sorry” mas. Esey ya ta demasiado laat.
Fuera di esey, varios detaye extra a bin dilanti mustrando cu Groeneveldt, ademas di tabata envolvi den un incidente serio algun tempo pasa cu un Banco local, lo tin hopi debe habri tambe na Hotelnan pa cu e eventonan di Destination Weddings cu e ta organisa. Pero si acaso bo sa cu bo no tin tempo pa cuida un mascota… pakico a busk’e anto?
