Dr. Edward Cheung di Aruba tambe rumbo pa mira e Eclipse Total di Solo na Spaña

Otro siman e evento celestial ta tuma lugar...

ORANJESTAD (AAN): Otro siman riba Diaranson, 12 di Augustus 2026 lo tin un fenomeno di Eclipse Total Solar den parti norte di hemisferio.  E eclipse aki lo ta visibel for di parti oriental di Grenland te cu e parti nort di Spaña, y e skina noordoost di Portugal.

   Durante e fase di “totalidad”, luna ta cubri solo completamente, lagando e areanan aki den scuridad total den dia, y rond di e silueta di luna por mira e corona lumbrante di solo.  Mayoria di Europa lo bay mira un eclipse parcial di solo.

   E sombra di luna lo pasa riba e peninsula di Iberia for di 8:27 pm te cu 8:32 pm.  Algun caminda na Spaña, lo bay keda te cu maximo 1 minuut y 40 seconde den scuridad.  E mapanan aki ta pa cortesia di Spanish National Geographic Institute, basa riba calculonan di Observatorio Astronomico de España.

   Pa cualkier ciudadano di Aruba cu por ta den e area aki di Europa, corda bon pa nunca wak directamente den solo, hasta si e ta un eclipse parcial (sin proteccion di wowo), pasobra bo ta riesga daño permanente na bo bista.

   Dr. Edward Cheung: 

   DIARIO por a compronde cu e cientifico local, Dr. Edward Cheung tambe ta uno di nan cu ta bayendo rumbo pa Spaña pa asina dia 12 di Augustus 2026 mira e Eclipse Total solar na Spaña.

   E biaha aki e eclipse lo ta hopi abao na horizonte, pasobra e ta socede apenas 1 ora prome cu bahada di solo.  Pues e lo bay ofrece un bunita show cu e cambionan di iluminacion den atmosfera.

   E eclipse total lo ta visibel tambe na Iceland.  E lo ta un eclipse parcial tambe pa cierto area na Merca.

   Dr. Cheung a splica cu esaki lo bay ta su di cuatro Eclipse Total Solar cu e ta experiencia.  E prome tabata Februari 1998 na Aruba.  Tambe el a mira esun na Oregon (Merca) na 2017, y Vermont (Merca) na 2024.  E lo ta viahando pa e eclipse aki a titulo personal, y ta viahando cu su casa Agnes.

   Mas despues den luna aki mes, Dr. Cheung ta bay ta pendiente ora cu NASA y Goddard Space Flight Center ta lanza e asina yama ‘Roman Space Telescope’ den espacio.  Su nomber oficial ta “Nancy Grace Roman Space Telescope”, y e ta un telescope infrared di espacio di NASA, cual construccion a finaliza dia 25 di November 2025.  Nancy Grace Roman ta ex-Hefe di Astronomia na NASA.

   E telecope ta basa riba un spiel primario wide field di 2.4 meter cu a wordo duna como donacion door di National Reconaissance Office, y lo transporta dos instrumento cientifico.  E Wide-Field Instrument (WFI) ta un camera di 300.8 megapixel multiband visibel y near-infrared camera, cu ta suministra imagennan hopi skerpi compara cu loke por a mira cu e Hubble Space Telescope, y cu ta 100 biaha mas grandi cu e cameranan cu Hubble tabatin.  Tambe e Coronagraph Instrumento (CGI) ta un camera di high-contrast small field of view y cu su spectrometer ta cubri ondanan visibel y near-infrared usando un sistema di starlight-supression technology.

   E metanan di e Telescope aki ta multiple, incluyendo busca contesta pa preguntanan basico encuanto “dark energy”, complementario cu e mision Euclid di European Space Agency (ESA), y ta bay check aceleracion cosmico causa pa un componente nobo di energia of door di e kiebro di general relativity riba scalanan cosmologico.

   Ta bay yuda cu census riba exoplanetanan pa yuda contesta pregunta riba potencial bida den universo, y mucho mas.