The content originally appeared on:
Diario
Durante encuentro Ban Topa
ORANJESTAD (AAN): Diaranson anochi, Partido Movimento Electoral MEP a start su campaña pa eleccion 2024 cu un reunion di Ban Topa den Centro di Bario Lago Heights na San Nicolas. Cu esaki, partido MEP ta duna inicio na e temporada cortico cu lo conduci na eleccion dia 6 di December binidero.
Riba e anochi aki, den un Centro di Bario completamente yen, a duna un discurso Lider di partido Evelyn Wever-Croes, y candidatonan riba lista Erich Genser, Alvin Molina, Glnbert Croes, y Dangui Oduber, ken nan a comparti informacionnan valioso cu e habitantenan, di e logronan, y e vision pa San Nicolas.
Evelyn Wever-Croes
Durante su discurso, Evelyn a papia riba e logronan di Gabinete Wever-Croes y a pasa riba e topico di pensionadonan. Tambe el a splica cu RAIZ, pa capricho di un miembro di su partido, a kibra acuerdo entre RAIZ y MEP y a cera aliansa cu partidonan den oposicion. Por lo tanto, no por tin confiansa mas den e gobernacion di coalicion.
Tambe el a reitera di ta cla pa sigui traha cu curason manera el a bin ta haciendo na bienestar di pais Aruba. El a expresa cu e tin tur confiansa cu pueblo sa kico tur partido MEP a haci durante e gobernacion di Gabinete Wever-Croes, Gobierno despues di un pandemia, cu hopi trabou y esfuerso a pone Aruba bek riba e caminda di finansas sostenibel. Por ultimo el a introduci e logo oficial di MEP splicando kico cada atributo ta nifica.
Erich Genser
Erich a papia di varios proyecto cu a wordo realisa na San Nicolas. El a cubri Raceway Palo Marga, e Village Basketball Court na Sint Maarten Straat cu a wordo renoba, Community Pool cu a haya su mantencion y fondo necesario, Scolnan cu a haya nan materialnan por medio di e proyecto Edutech, y e proyecto di Secrets na Baby Beach.
Alvin Molina
Como representante di San Nicolas, Alvin a papia di e support cu nos como local mester duna na e comerciantenan di San Nicolas, e actividad y eventonan cu mester wordo organisa, aparte di tur cu a wordo haci caba, pa trece bida den e bario. Tambe ela a papia di e inversionnan cu a wordo haci te awor, y riba e vision y posibilidadnan den futuro pa sigui inverti den varios otro area di San Nicolas.
Glenbert Croes
Glenbert a inicia su discurso cu un video ilustrando e logronan di Gabinete Wever- Croes II, cual ta e proyecto di Hotel Secrets, e apertura di EPE San Nicolas, y su esfuersonan haci pa loke ta energia sostenibel. Despues di e video presenta, el a bay poco mas en detayes di cada topico.
Dangui Oduber
Durante su discurso, Dangui a reitera e importancia cu e crecemento di turismo tin pa Aruba. El a splica cu danki na e crecemento aki, awe Aruba tin un economia stabiel, presupuestonan cu surplus, porcentahe di desempleo a baha, inversionnan den enseñansa, deporte cu ta hayando tur atencion, y e inversionnan cu a wordo haci pa un Aruba sigur.
“Mi ta gradici cada un di boso cu a asisti na e reunion di Ban Topa. Tambe mi ta pidi boso sosten na partido MEP den e siguiente eleccion, paso cu boso sosten y apoyo, mi ta convenci cu partido MEP lo sali victorioso dia 6 di December binidero” Evelyn Wever – Croes a expresa.
