The content originally appeared on:
Diario
Diasabra atardi
ORANJESTAD (AAN): E aumento den uso di blaas tipo Mylar, y yena cu gas helium a aumenta drasticamente na Aruba ultimo tempo, ya cu e ta obtenibel awor na mucho mas negoshi compara cu antes. Y ta hopi hende awor tin gas helium pa yena e blaasnan aki. Antes ta 3 negoshi so tabata yena helium, pero awor hasta na gasoline station por haci esey.
Nan ta great pa fiesta, pero a bira un dolor di cabez pa companianan di electricidad rond mundo, como cu cada biaha tin storing, y si yega na tempo por haya e resto di blaasnan ainda pega den wayanan di coriente, pa asina compronde ta kico a ocasiona e storing.
Pesey riba Diasabra atardi, atrobe un blaas di Mylar cu a los for di cualkier fiesta of man di un mucha, a bay halto y dal den wayanan di halto voltahe, y a pone varios bario keda sin coriente, pa mas di 1 ora largo. E momento a yega pa bo ta conciente riba e uso di e blaasnan aki. Varios aña caba DIARIO a yega di publica informe di e blaasnan aki causando interupcion di coriente na Aruba, pues e ta nada nobo.
Diasabra atardi pa 4:39 pm, e compania NV Elmar a ricibi alarma di otro storing den area di Oranjestad, Bushiri, Paardenbaai y vecindario. Tecniconan a cuminsa busca e problema, y a bin topa cu e situacion aki. Un otro blaas di Mylar yena cu helium cu ta drenta den nan red di coriente, y ocasiona interupcion.
Coriente a cay for di e areanan aki, incluyendo Santa Helena, Ponton, y yega te Tanki Flip. Esaki a bira e di 2ndo bes cu Tanki Flip ta perde coriente debi na blaas Mylar pega den palo di luz. Ultimo biaha tabata Diadomingo 14 di April 2024, ora uno a pega pariba di Almacen Elunid na Tanki Flip.
E interupcion aki no tabata facil pa resolve, como cu tin varios proceso di chekeo prome cu djis pone fuse bek.
Finalmente te banda di 5:45 pm, pues mas di 1 ora, a pone coriente bek pa tur bario. Danki na e team di tecniconan cu a traha diligentemente riba esaki.
