Parlamentario Xiomara Maduro cu palabranan dedica na Norman de Palm kende recien a fayece

ORANJESTAD (AAN): Cu tristesa, pero cu hopi gratitud, Parlamentario y ex Minister di Cultura Xiomara Maduro ta recorda Sr. Norman de Palm, un figura importante den e mundo di cine, teatro y cultura na Aruba y Curaçao.

   Norman de Palm tabata un cinematografo, artista, escritor, actor y productor di cine extraordinario, cu a contribui na produccionnan manera Desiree, Almacita di Desolato, y Ava y Gabriel – un historia di amor. Naci na Aruba, su biahe cultural a sigui na Curaçao unda el a sigui desaroya su talento desde hoben.

   Hunto cu Sr. Felix de Rooy, el a crea obranan di gran balor artistico cu a haya reconocemento internacional. Pero mas cu su exito profesional, Norman tabata un brug entre cultura y hende. Su trabao pa promove intercambio artistico entre e islanan a fortalece e lasonan cultural y social entre Aruba y Curaçao.

   Norman a dedica su bida na engrandece e arte teatral, colaborando cu Departamento di Cultura di Aruba y inspirando generacionnan di hoben artista atraves di programanan manera Arte di Palabra y Gang di Arte.

   Como ex Minister di Cultura, Parlamentario Xiomara Maduro tabata tin e honor y placer di reconoce Sr. Norman de Palm pa su aporte balioso na e arte di teatro riba Dia di Teatro den aña 2023.

   Su vision tabata cla: kibra frontera, crea oportunidad y laga cultura uni hende.

   “Nos kier mustra nos profundo agradecimiento pa tur loke Norman a logra. Su legado lo sigui biba den cada artista cu el a inspira, den cada escenario unda su influencia ta sinti, y den cada historia cu ta sigui wordo conta,” Maduro ta expresa.

   “Masha danki, Sr. Norman de Palm, pa bo amor, pasion, disciplina y dedicacion. Descansa na paz. Bo legado ta biba semper. Condolencia na famia, amistades y mundo artistico di Aruba y Curaçao,” ta palabranan di Parlamentario y ex Minister di Cultura Xiomara Maduro.