Parlamentario Christiaans-Yarzagaray ta puntra su mes si fraccion di AVP no kier pa Aruba tin un Ombudsman
22 December 2025
ORANJESTAD (AAN) – Parlamentario Setty Christiaans- Yarzagaray a toca e tema di Ombudsman, durante e conferencia di prensa di fraccion di MEP, Dialuna mainta.
E ley aki a wordo trata den Parlamento Diahuebs cu a pasa, pero en principio e ley riba su mes a wordo pasa na aña 2020 y na 2021 mester a hancra cambionan den nos Constitucion, y e reunion aki no a termina, pa locual a sigui Diahuebs ultimo.
Christiaans-Yarzagaray a bisa cu su fraccion a yega na e conclusion cu e opositornan no ta di acuerdo pa introduci un ombudsman na Aruba.
Ombudsman su funcion ta Defensor di Pueblo, y ta na banda di Parlamento, cu ta esnan cu tin controla no solamente Gobierno sino diferente instancia y institutonan na unda ora cierto cosnan ta bay robes den comunidad, pueblo por acerca e persona aki of e Instituto di Ombudsman, unda e persona por trece cierto informacionnan cu lo por wordo investiga, y asina tambe e tin su funcionnan, pa por ehemplo, no solamente e cosnan cana bon sino pa evita cu tin corupcion, zorg pa gobierno tin un bon gobernacion, y tambe pa purba mantene e parti financiero riba bon caminda.
E parlamentario a indica cu e prome iniciativanan a bin desde aña 2005, den e caso aki door di señora Zulay van Poppel, despues gobierno a cambia no a piki up mesora, despues otro partidonan a hacie.
El a remarca cu partidonan cu Diahuebs por a scucha grita den Parlamento, tabata ocho aña den gobernacion y no a introduci ni un cambio cu nan a grita pe Diahuebs cu a pasa.
E cosnan aki ta haci puntra bo mes si nan kier of no kier pa Instituto Ombudsman bin Aruba of no. Defensor di Pueblo ta un Instituto cu a wordo institui na Hulanda, Curacao, Sint Maarten y den paisnan di Reino, y Aruba ta e unico cu falta pa introduci esaki.
E parlamentario a reitera cu e ley riba su mes a pasa caba, su introduccion y hancramento den su parti Constitucional ta dune e forza y peso cu hustamente Diahuebs, cu tur e gritonan cu por bisa cu nan no ta kere den dje, cu nan no tin confianza, no ta cuadra; pasobra hustamente e hecho cu por wordo hancra den e Constitucion ta mustra su peso.
