One Happy Island Lions Club ta invita pueblo en general pa haci donacion na Tayo Riba Mesa

ORANJESTAD (AAN): Tayo Riba Mesa ta un proyecto popular y bunita di One Happy Island Lions Club.

Esaki ta un proyecto di ‘Hunger Relief’ cu ta un causa global di Lions Club Internacional na unda cu Lions Club ta yuda famianan den necesidad pa tin cuminda riba mesa.

   Señor Junior Arends, den entrevista cu DIARIO a duna di conoce cu pa fin di aña aki,  OHIL ta organisando e di dos edicion di Tayo Riba Mesa Edicion Pasco na unda nan ta colecta comestibel (cuminda seco), regalo pa mucha, articulo higienico y personal.

   Diasabra proximo, dia 13 di december, di 10’or di mainta pa 1’or di atardi, One Happy Island Lions Club lo ta na Centro Kibrahacha na Piedra Plata na unda cu comunidad di Aruba por yega pa haci donacion.

   Pa esnan cu no por yega Centro Kibrahacha y ta desea di haci donacion, por contacta One Happy Island Lions Club libremente na telefoon 568-0829 y lo percura pa un miembro yega pa ricibi e donacion.

  Señor Arends ta encurasha pueblo di Aruba en general pa acudi na e yamada aki. Companianan por recauda productonan entre empleadonan y entrega esaki na Centro Kibrahacha diasabra awo.

  E meta di One Happy Island Lions Club ta pa yuda 100 famia na Aruba y asina hunto cu otro instancianan na Aruba, por yuda mas tanto famia possible den nos comunidad.

  “Nos ta conta cu apoyo di comunidad. Hunto nos por yuda pa famianan pasa dianan di fiesta na un miho manera”, señor Arends a expresa.