The content originally appeared on:
Diario
ORANJESTAD (AAN) – Den conferencia di prensa di Gobierno Diahuebs 14 di Maart, Minister di Naturaleza, Transporte, Integridad y Asunto di Adulto Mayor, a hiba palabra.
E mandatario a expresa e tema di e conferencia di prensa aki ta uno, cu nos tur tin en comun. Esaki ta “Nos conexion cu naturaleza”.
“Cu gran respet pa nos conexion cu naturaleza, mi ta para aki, awe”, e dignatario a expresa y a remarca cu no solamente como Minister di Naturaleza y representante di Gobierno, sino como un ciudadano mas di Pais Aruba.
“Den nos mundo cu ta impulsa pa progreso nos, frecuentemente, ta trata naturaleza como un mercancia, un obheto pa ser uza na nos conveniencia pa genera ganashi economico.
Nos accionnan a remodela, a cambia nos medio ambiente, na un punto cu e ecosistema cu nos ta depende riba dje, no por funciona manera antes mas. Esaki no solamente tin efecto riba e medio ambiente pero tambe riba nos bienestar social, ya cu e bienestar di nos hendenan ta inseparable liga na e bienestar di e naturaleza. Particularmente Aruba, su economia cu ta testimonio di e independencia aki. Nos sector turistico, cu ta floreciendo, ta saca su forza for di e naturaleza cu ta rondona nos”, Minister Ursell Arends a indica.
E mandatario a agrega cu den e contexto aki el a bin e conferencia di prensa pa introduci un proposicion di ley di Derecho di Naturaleza, ancra den nos Constitucion.
“E Legislacion aki ta un paso historico pa reconoce e derecho cu ta interconecta y fundamental y esaki nos ta haci atravez di inculca esaki den nos Constitucion. Tin dos aspecto: Uno ta e derecho pa tur ser humano tin un medio ambiente limpi, saludable y sostenible. E di dos aspecto ta e derecho di e naturaleza, di su mes, tanto riba tanto riba tereno como riba tera y tambe bao awa, e derecho di conservacion, restauracion, y regeneracion”, Minister Ursell Arends a señala.
El a agrega cu e dos derechonan aki, cu ta interconecta y fundamental, tin e concepto y proposicion di ley pa ancra esaki den e Constitucion di Aruba.
