The content originally appeared on:
Diario
ORANJESTAD (AAN): Diamars mainta trempan a tuma luga un razzia na DIMAS y Cocolishi,
relaciona cu un investigacion amplio riba un posibel caso di corupcion entre otro na DIMAS y hendenan cu ta trahando na ministerio di integracion. E caso aki ta bira conoci como ‘Caso Portulaca’. E razzia teni tabata na dos cas, dos negoshi, oficina di Gobierno na Cocolishi, y edificio di DIMAS.
Minister Glenbert Croes, como minister encarga cu e cartera di integracion, a informa cu nan lo duna tur cooperacion pa cu e investigacion aki.
Un di e prioridadnan di Gabinete Wever-Croes, desde cu nan a drenta gobierno, ta pa combati corupcion, y pa Minister Glenbert Croes esaki no ta un excepcion. Un di e areanan cu semper a conoce corupcion ta den e departamento di permiso, y aki ta unda e investigacion amplio ta tumando luga.
Mester confirma, cu Minister di Integracion Glenbert Croes no ta implica den ningun asunto cu por ta dudoso, y a duna instruccion na tur departamento envolvi, incluyendo su mesun ministerio pa duna tur cooperacion necesario pa e berdad sali na cla, y cu por duna cuenta na pueblo di e rectitud di e proceduranan den e maneho cu gobierno ta hibando riba tereno di labor, energia y integracion.
Minister Croes a splica cu e desafionan aki semper bo ta encontra na momento cu bo purba di goberna un pais corectamente, mirando cu den pasado ya nan a purba di implica Minister den asuntonan incorecto. “Pa mi ta importante pa pueblo sa, cu mi ta sostene e investigacion aki, paso ta asina so nos por caba cu e corupcion cu tin den loke ta proceduranan di permiso, na unda hendenan cu mester di un permiso ta wordo hinca den situacionnan dificil pa por saca nan permiso” Minister Croes a expresa.
Gobierno ta desea pa e maneho cu ta wordo hiba na DIMAS, y tur otro departamentonan, na unda hendenan mester acudi pa haya nan permiso, paso nan a cumpli cu tur rekisito, ta un maneho corecto y husto pa esnan cu a bin estableci nan mes na Aruba pa un miho bida.
E mandatario a indica cu investigacionnan asina ta di lamenta, pero cu e ta spera cu e investigacion aki tuma su tempo pa asina por saca afo tur esnan cu ta envolvi den e actonan aki, y al final lo mester wanta e consecuencia. Ta solamente di e manera aki, lo por stop e corupcion aki cu ta afectando e ministerio di integracion, y nos pais en general negativamente.
