Minister di Finanzas a elabora tocante e rapport “Beleidsevaluatie Protocollen Aruba-Nederland”

​

*Presenta pa Secretario di Estado van Huffelen den Tweede Kamer

ORANJESTAD (AAN)—Tocante e tema “Resultado di evaluacion di supervision financiero di Aruba”, Gobierno a convoca e conferencia di prensa di Diaranzon 22 di Mei awo, den cual Minister di Finanzas y Cultura Xiomara Maduro, a hiba palabra.

            Minister Xiomara Maduro a cuminza bisando cu e lo elabora tocante un rapport cu recientemente a keda presenta pa Secretario di Estado señora Alexandra van Huffelen na Tweede Kamer, despues cu dia 12 di September di aña 2022, a indica cu e lo bay evalua, entre otro, e protocolnan pa yuda e paisnan  den Reino, pa cu supervision financiero. Aki ta trata di e rapport “Beleidsevaluatie Protocollen Aruba-Nederland”, na unda entre otro, Economische Bureau Amsterdam a haci un investigacion extenso, pa mira con e evaluacion ta, kiermen con Aruba ta para den e evaluacion financiero, basa riba protocolnan.

            “Manera ta conoci, tin varios protocol cu e ultimo añanan a wordo firma cu Aruba. Asina bo haya protocol na 2011, 2013, 2015, 2918 y e ultimo na 2022. Locual a wordo ta cu a haci e ora ey ta un evaluacion, pa mira cu e tools cu ta locual Conseho di Minister di Reino tin, pero tambe tools cu tin den Ley, por ehemplo esun di e Ley di Supervision di LAft, y e ora ey nos tin tambe normanan financiero, cu nos tin cu adheri na dje y tambe e supervision door di e Colegio di CAft”, Minister Maduro a relata.

            E mandatario a mustra un sinopsis cu ta indica di e financieel toezicht di Aruba, kico tur a keda realiza y kico no a keda realiza den esaki, y claramente kico ta e puntonan di mehoracion. 

KICO TUR A KEDA REALIZA:

            Riba esaki el a splica lo siguiente: Encuanto e metanan cu a keda realiza t’asina cu e debe di Aruba ta bahando, y tambe e gastonan di personal. Aruba ta cumpli cu e normanan financiero cu a wordo stipula den e protocolnan y tambe Aruba tin mas transparencia encuanto finanzas publico.

“Loke nos ta presenta awor sigur ta informacionnan cu ta yuda pa crea un transparencia mas grandi di e finanzas publico, sin laga afo e rapportnan financiero, cu ultimo temponan aki nos a bin ta conoce na Aruba. Tur esakinan a wordo evalua y ta pone e ora ey yega na e conclusion cu tin mas transparencia den e parti di finanzas publico”, Minister Maduro a señala. 

KICO NO A KEDA REALIZA:

            Minister Xiomara Maduro a señala cu locual no a keda realiza ta cu e maneho financiero di Pais Aruba, ainda no ta na ordo. Pero na mesun rosea ta wordo meniona cu den cuadro di e Lands Pakket ta trahando pa mehora e parti financiero aki.           

SIN REBAHO DI INTERES P’ ARUBA:

            Tambe por menciona cu Hulanda no a duna Aruba un rebaho di interes pa medio di inscripcion di Hulanda, pa cumpra bono di Gobierno, manera a acorda den e protocol.

            “Hulanda tampoco a brinda e asistencia tecnico cu a necesario pa Aruba, manera a acorda den e protocol di aña 2015 y, aworaki, esaki ta un di e puntonan cu den Landspakket lo wordo atendi cu ne. Por ultimo, locual no a wordo realiza ta cu e protocolnan cu a existi pa supervision financiero na Aruba, hunto cu e supervision haci door di CAft tampoco a wordo evalua, y esaki tambe tin efecto riba e supervision financiero di Aruba”, Minister Xiomara Maduro a remarca.