The content originally appeared on:
Diario
Errol de Freitas, Presidente di SNBA:
ORANJESTAD (AAN) Errol de Freitas, Presidente di San Nicolas Business Association (SNBA), den entrevista cu DIARIO a bisa cu mester cuminza reforesta San Nicolas, treciendo e matanan bek manera tabata tin anteriormente.
“Nos tin hopi awa septic di riool, na KIA, cu ta bayendo perdi. Tin boshi mata cu ta parce druif, pero e asunto ta cu mester yega na un punto cu mester drech’e, y e awanan sirbi eynan ta mas cu suficiente pa sirbi e area, anto mester cuminza pensa riba esey”, el a bisa.
El a agrega cu por cambia of traha edificio, pero mester pensa riba e aspecto ey di e Isla, anto SNBA a wordo acerca door di un grupo cu tin un bon plan pa esaki. Y e ta spera cu gobierno ta bay tin un bon atencion na dje.
El a informa tambe cu SNBA tabata organizando un “members meeting” cu aspectonan nobo di e Asociacion, e siman aki, pero nan mester a postpone pa un siman, pasobra nan ta cla pa lanza e vision pa San Nicolas, prome na su miembronan y e prospectonan nobo pa wak kico nan ta pensa, y kico nan kier cambia.
“Tin hopi tempo cu nos ta keto, y hopi grupo onderhands ta papiando, y esey ta normal den e area, pero na final nos ta bay invita tur prome pa bin papia, y despues nos lo bay riba locual nos a cuminza cu ne; nos a cuminza cu Cumbre, y despues cu e Community Garden, caminda nos a yama comunidad pa bin haci nan preguntanan anto tur e manehadornan di proyecto lo ta presente”, De freitas a indica.
