Mervin Wyatt a permiti acto ilegal den Parlamento di Aruba

Hopi placa Pueblo ta paga pa hasta pa sospechosonan den casonan criminal - *Wyatt-Ras no a actua contra fraude di miembro di Parlamento den eleccion Presidente - *Tin castigo di prizon pa falsificacion di voto pa cual no a traha proces verbal rekeri

ORANJESTAD (AAN) — Manera DIARIO a trece dilanti den su edicion di ayera, un caso sumamente lamentabel a wordo registra durante e prome reunion di e constelacion nobo di Parlamento di Aruba.

Pa comprende e realidad di loke a pasa durante e prome reunion, mester ta bon na haltura di e reglanan sumamente estricto cu tin pa funcionamento di e representacion di Pueblo, cu Parlamento ta y e realidad cu Parlamento ta un organo halto di Estado cu mester ta capaz pa controla gobernacion diario di e pais.

Sumanan enorme e Arubiano ta paga pa e tin un representacion. Por cuminsa cu e salarionan enorme cu Miembronan di Parlamento ta ricibi pa nan haci nan trabou for di tempo cu a cambia leynan y a haci trabou di Parlamento full time y asina areglonan mas barata cu tabata tin, a pasa pa historia.

E ciudadano Arubano mester paga salario di Miembro di Parlamento, beneficionan di Miembro di Parlamento, un fondo pa e por paga pa asistencia den su trabou.

E ciudadano Arubano mester paga pasashi y estadia den exterior pa tur biahe cu e Miembronan di Parlamento ta haci y otro compensacionnan mientras mester paga pa edificio pa oficina pa un representacion cu sikiera pa e placa cu e ta ricibi di e pagador di belasting mester respeta Pueblo di Aruba.

Mientras Aruba mester paga hasta pa sospechosonan den casonan criminal manera e casonan di Benny Sevinger y Alan Howell, ta mas cu tristo nota, cu Parlamento mes no ta tene su mes na regla.

DIARIO na hopi occasion a mustra con pa falta di respet pa Pueblo, Gobierno Mike Eman a haya oportunidad di firma Acuerdo cu Citgo cu hasta contra tur ley a tene secreto pa Pueblo y pa Parlamento.

DIARIO a mustra con den pasado e miembronan di Parlamento pa AVP a trapa riba e control cu nan mester tin riba gastamento di placa y con nan a entrega na Mike y Benny e 1.6 Miljard Florin.

Ta tristo pa nota loke a pasa durante e prome reunion di e constelacion nobo di Parlamento ora pa regla, e miembro di fraccion di AVP, Wyatt-Ras a haya oportunidad di presidi e prome reunion di e constelacion nobo di Parlamento.

Ya cu e Presidente ta wordo eligi, Ley ta indica cu e miembro cu mas tempo a yega di sirbi den Parlamento, ta fungi como Presidente te na momento cu scoge un Presidente nobo.

Esaki a haci cu Wyatt-Ras a haya oportunidad dirigi e prome reunion di Parlamento y dirigi e proceso pa nombra un presidente nobo di Parlamento.

Tur miembro ta ricibi for di man di Griffier, un papel pa vota pa e Presidente nobo. Nan ta debolbe e papel aki cu e nomber cu nan kier.

Durante e reunion cu Wyatt-Ras a dirigi, conteo di votonan a duna prueba cu un voto a wordo falsifica. Tabata tin un papel di votacion mas, cu a wordo yena cu nomber di Benny Sevinger y cu reconteo.

Con e papel di voto a subi mesa ta desconoci.

DIARIO a sigui investiga e asunto prome cu a bini cu e resultado final di loke Ley ta exigi den e caso aki.

Informacion oficial ta mustra cu Wyatt-Ras, mester a actua immediatamente y confisca tur e papelnan di voto y traha un proces verbaal contra loke a pasa.

Mester a cuminsa un investigacion penal den cual a bay verigua e base di e forma cu e nombernan tabata skirbi, kende a falsifica e voto den Parlamento. Mester a tuma fingerprint y realisa tur investigacion necesario.

Informantenan clave a mustra DIARIO cu ta trata aki en berdad di un crimen ya cu a falsifica un papel cu ley ta exigi den Parlamento.

DIARIO hasta tin informacion cu den e caso aki, e politico cu a falsifica e voto por haya castigo di prizon segun Codigo Penal.

Topico di awe ta pakico Wyatt -Ras no ta actua si ley hustamente ta entrega presidencia di e prome reunion di Parlamento na un persona cu conocemento di funcionamento di Parlamento.

DIARIO ta sigui traha riba e caso aki, cu ta topico di hopi Arubiano cu no ta acepta loke ta pasa den e representacion di Pueblo, cu mester atende loke a pasa durante e prome reunion di e constelacion nobo.