Meldpunt pa abuso contra adulto mayor lo wordo anuncia oficialmente pronto

Directora di Directie Ouderenzaken, Desiree Helder:

ORANJESTAD (AAN) – A raiz di e simposio riba abuso contra adulto mayor cu a tuma luga aña pasa, Directie Ouderenzaken a tuma accion inmediato pa establece un meldpunt dedica pa trata e tipo di casonan aki. Desde januari di e aña aki, un profesional specialisa ta trahando na Directie Ouderenzaken y ta encarga cu e atencion y coordinacion di e meldpunt pa abuso contra adulto mayor. 

Directora di Directie Ouderenzaken, Desiree Helder, a informa cu actualmente e departamento ta trahando riba e formacion di un ekipo multidisciplinario cu lo sostene e iniciativa aki. Segun Helder, hopi di e situacionnan cu ta presenta ta compleho y no por wordo resolvi door di un solo instancia.

Pa e motibo aki tambe, prome cu lansa e meldpunt oficialmente, ta finalisando convenionan formal di cooperacion cu diferente instancianan concerni, pa defini claramente e responsabilidadnan y procedimentonan relaciona cu e atencion di casonan di abuso contra adulto mayor. 

Helder a enfatisa cu, unabes cu tur e acuerdo y protocolnan necesario ta cla, e meldpunt lo wordo presenta oficialmente na comunidad. “Manera cu tur e convenionan aki keda finalisa, nos lo anuncia oficialmente e meldpunt,” el a remarca. 

Segun Helder, aunke e lansamento oficial ainda no a tuma luga, desde januari ya ta atendiendo meldingenan cu ta drenta. Directie Ouderenzaken ta den colaboracion estrecho cu diferente instancia, incluyendo KPA, Departamento di Asuntonan Social, Veiligheidshuis y otro organisacionnan relevante. 

Tocante e casonan cu a wordo reporta desde januari, e directora a indica cu gran parti di nan ta relaciona cu conflicto familiar. Den hopi situacion, desacuerdo entre miembronan di famia ta resulta den negligencia of falta di cuido adecua pa e adulto mayor. Mayoria di e casonan ta di naturalesa social. Den cooperacion cu Departamento di Asuntonan Social, ta busca e miho solucion posibel pa cada situacion. 

E anuncio oficial di e meldpunt ta planifica pa final di juni of na comienso di juli. Entretanto, e linea telefonico 281-5182 ya ta disponibel pa ricibi meldingnan. Tur ciudadano cu ta sospecha of observa posibel abuso contra un adulto mayor por tuma contacto cu Directie Ouderenzaken durante oranan di oficina pa reporta e situacion.