Mas famia finalmente a bira doño di nan propio hogar

Gabinete AVP-Futuro ta sigui cumpli “Ban firma”

ORANJESTAD (AAN): Durante un ceremonia especial na Fort Zoutman, 20 ciudadano a ricibi e acta oficial di erfpacht di nan cas, un paso importante cu finalmente ta reconoce nan como propietario legal di e vivienda caminda nan a biba pa hopi aña.

Durante añanan, diferente habitante di casnan di pueblo rond di Aruba a haya oportunidad pa cumpra e cas cu nan tabata biba aden for di Fundacion Cas pa Comunidad Arubano (FCCA). Hopi di nan a logra paga nan cas completamente, pero e proceso di traspaso oficial di e propiedad a enfrenta retraso pasobra e tereno tabata registra riba nomber di Pais Aruba.

Desde cu Gabinete AVP-Futuro a asumi gobernacion, gobierno a pone como prioridad pa scucha e comunidad y atende preocupacionnan cu ta surgi durante contacto directo cu comunidad. Un di e temanan cu regularmente a bin dilanti tabata precisamente e situacion di e habitantenan cu a paga nan cas pero cu ainda no tabatin e acta oficial di propiedad.

Prome Minister Mike Eman a tuma e peticionnan aki hopi na serio y a convoca algun reunion cu representante di FCCA, Directie Infrastructuur en Planning (DIP) y Dienst Landmeetkunde en Vastgoedregistratie (DLV) pa busca solucion. E esfuerso conhunto aki a resulta den e posibilidad pa finalmente completa e proceso di traspaso.

Durante su discurso, Prome Minister Eman a resalta cu e momento aki, cual tin un significado special, particular den marco di 40 aña di Status Aparte y e lucha historico di pueblo Arubiano pa logra mas autonomia.

“E lucha pa autonomia tabata basa riba e idea cu Aruba mester tin mas derecho pa determina su propio prioridadnan, pero tambe pa percura cu e recursonan di nos pais ta keda comparti den forma husto cu nos comunidad. E motibo cu nos ta aki awe ta precisamente pa cumpli cu e responsabilidad aki: percura cu tur ciudadano por tin un bida digno y di calidad.”

Durante su discurso, Prome Minister Mike Eman a recorda e pensamiento di su abuelo, lider historico Henny Eman, citando un fragmento di un discurso den Hulandes cu ta refleha e filosofia di gobernacion basa riba responsabilidad y husticia pa comunidad.

“Niemand, hooggeplaatst of niet, geen bestuur, geen landraad, geen ingezetenen heeft de huidige gunstige economische toestand op onze plaats gecreëerd. Doch de hand der voorzienigheid. En steeds blijft de zorg van de hemel, die voor geen mens door zijn kunstmatige middelen voorzien kan worden. De landraden zijn er als hoofzaak om naast het plaatselijk bestuur te zorgen dat wat ons hemelse vader ons geeft, naar verhouding en gelijk wordt verdeeld onder ons volk.”

Prome Minister Eman a splica cu e mensahe aki taun recordatorio, cu e responsabilidad di gobierno ta pa percura cu e bienestar di e pais ta comparti hustamente cu e pueblo, un principio cu tambe ta refleha den e esfuerso pa haci posibel cu famianan finalmente por bira doño di nan propio cas.

Eman a agrega cu e entrega di e actanan di propiedad ta representa mas cu un proceso administrativo, pero un paso importante pa cumpli un compromiso cu famianan cu pa añanan a warda pa e momento aki.

“Boso a spera hopi tempo pa e momento aki, y awe nos ta contento cu finalmente nos por cumpli cu boso. Mi desea boso hopi bendicion den boso mesun cas.”

E ceremonia a tuma lugar den presencia di Minister di Infrastructura drs. Rene 'Baba' Herdé, representante di FCCA, funcionario di DIP y DLV, notario y famia di e beneficiario nan.

Prome Minister tambe a expresa palabra di gradicimento na tur esnan cu a contribui pa haci e proceso posibel, incluyendo funcionario di diferente departamento gubernamental y representante di FCCA cu a traha hunto pa logra e resultado aki.

Gobierno ta sigui traha riba iniciativa pa alivia escasez di vivienda, incluyendo cooperacion entre sector priva y gobierno pa stimula construccion di vivienda di calidad y pagabel. E vision tambe ta inclui renovacion y revitalisacion di bario, brindando oportunidad pa famianan hoben, profesionalnan hoben y adulto mayor pa haya un lugar digno pa biba.

Cu e entrega di e erfpachtakte aki, 20 famia Arubiano mas a logra un paso importante den nan bida: e siguridad di por bisa cu nan ta doño di nan propio cas.