Mama bao influencia a bolter auto cu yiu chikito aden

Accidente serio na Spaans Lagoen:

ORANJESTAD (AAN): Un accidente serio a tuma lugar Diahuebs anochi rond di 8’or na Spaans Lagoen, un tiki mas pariba di Mangel Halto. Un Nissan March cu un mama na stuur, cu su yiu chikito den auto, aparentemente a perde control y a dal contra un auto staciona y despues a bolter.

E impacto fuerte a causa habitantenan di e area a alerta polis.

Polis y ambulance a reacciona mesora y a sali cu urgencia pa e lugar, unda nan a haya un accidente serio cu hende herida.

Segun testigonan, e senora tabata visiblemente bao influencia. Na momento cu paramediconan a yega, nan a atende cu e mucha di biaha, cu tabata hopi spanta. E mama, sinembargo, a reacciona agresivo contra e personal medico.

Polis di trafico a interveni, a haci e dama supla y a resulta cu el a bebe. El a wordo deteni y a warda pa transportwagen. Durante esaki, tata di e criatura a yega riba lugar pa bay cu e mucha, y tabatin un intercambio tenso di palabra.

Mas despues, un yiu muhe y otro miembronan di famia a presenta, a pidi pa papia cu e mama y a recoge e pertenencianan cu tabata keda den e auto, cu a keda completamente destrui.

Finalmente, transportwagen a yega y a hiba e dama na warda di polis.

E caso ta mustra con alcohol y stuur no ta mescla. Un situacion peligroso, sin pensa riba e consecuencianan, especialmente ora tin un bida inocente involucra.