The content originally appeared on:
Diario
Edward Maduro, lider di SADA:
ORANJESTAD (AAN) Edward Maduro, Lider di Sindicato di Aduana (SADA), a indica den entrevista cu DIARIO, cu e proceso di indexering a dura largo, pasobra na 2019 a cuminza, y apesar cu na 2014 tabata tin un acuerdo firma cu, eigenlijk, ya caba e gobiernonan mester a structura e indexering, y ta poni den palabra cu mester bay na un structura y un mecanismo, con ta bay regla indexering, lamentablemente, e gobiernonan no a hacie nunca.
“Pues e no ta un cuestion cu aworaki nos kier pa hacie. El a wordo treci dilanti y e ta poni den e documento, y aworaki mester bisa cu despues di 2019 nos a cuminza e negociacionnan di indexering y el a tranca. Na final a bin e pandemia y mester bisa cu danki Dios, gobierno a reconoce e derecho di duna indexering”, Maduro a señala.
E ta corda cu na 2008 e sindicatonan y ambtenaarnan a welga siete siman largo, pasobra gobierno e tempo ey no kier a reconoce e derecho di e trahado pa haya indexering. “Aworaki nos ta na un stap mas cerca di structura esaki, gobierno a compromete su mes na cuminza mas pronto posible pa bin cu e mecanismo aki, y nos ta pendiente aworaki di gobierno su invitacion y nos a señala esaki tambe dialuna cu nos a firma, y nos a bisa Minister cu nos ta cla pa cuminza anytime pasobra nos no kier p’e tarda. Pasobra si e para y bay di banda e chens ta grandi algo ta bay pasa cu atrobe, nada ta sosode y mester bay negocia atrobe riba algun aña cu a transcuri”, Edward Maduro a señala.
E lider sindical ta spera cu Gobierno atene su mes na palabracion, y yama e sindicatonan pronto pa wak con nan ta bay atende cu e tema aki.
El a agrega cu tin varios tema riba mesa, entre otro e digitalizacion cu a wordo para. “Mientras nos a discuti riba indexering pa varios luna, nos a cuminza combersa cu e minister presidente, tocante temanan los di indexering, cu mester di atencion urgente, y ta cuestion di cual tin prioridad pa cuminza atende. Tin algun reunion planea caba pa e aña aki, pero si gobierno ta atene su mes na palabracion e lo yama e sindicatonan na reunion pa atende cu e topiconan”, Presidente di Sindicato SADA a reitera.
