The content originally appeared on:
Diario
Pa RAIZ e proceso democratico ta sigui:
ORANJESTAD (AAN): Den e ultimo tempo e compromiso di RAIZ pa democracia y inclusividad a bin ta resalta ora ta trata e topico di matrimonio entre pareha di mesun sexo. Como plataforma politico, RAIZ cu principionan di igualdad a nabega e proceso democratico cu un meta claro; trece e discusion di ley di matrimonio entre pareha di mesun sexo den centro di debate di Parlamento.
Dia 22 di februari ultimo, parlamentarionan di RAIZ, Misha Raymond y Raymond Kamperveen a manda un carta na Presidente di Parlamento pa pidi pa un fecha. Diaranson 27 di maart 2024, Presidente di Parlamento di Aruba a confirma e fecha 8 di mei 2024 unda Parlamento lo ricibi e oportunidad democratico pa vota riba e ley.
RAIZ ta respeta estado di derecho y a laga espacio pa Hoge Raad tambe duna nan opinion. Pero e propio Hoge Raad tambe ta compronde cu ley di nos pais ta worde traha pa representantenan di Pueblo. Esey ta trabao di Parlamento. RAIZ a duna democracia espacio y awor tin un fecha fiho pa atende cu e ley aki y tin tur speranza cu den un debate sano y democratico e balornan di igualdad y inclusividad lo sobresali.
Ta importante pa remarca cu Hoge Raad a stipula e fecha di 31 di mei 2024 como e dia cu e decision final di casacion lo worde anuncia.
No obstante, RAIZ lo sigui defende y argumenta nos sosten pa e ley y su meta na un forma responsabel y cu respet pa otro. No tin obstaculonan cu lo cambia RAIZ su determinacion y compromiso pa cumpli cu proceduranan democratico pa derecho humano. RAIZ ta keda para pa respet mutuo y igualdad entre tur nos hendenan.
