Jossy Mehsen Mansur: e nomber lubida di autor di Aruba

​

Dia 7 di Juni 1934 su curazon a cuminsa bati pa Aruba Dushi Tera

*Pionero cu a percura pa diariamente skirbi historia di Aruba

*Relato especial di Prome Hefe di Redaccion di matutino DIARIO 

ORANJESTAD(AAN)—Solo a cuminsa baha riba un dia calor di 1982 na Curacao. Na yegada na cas di mi mayornan, mi no por a mira adelanta, cu e ocaso di solo lo a habri porta pa un compromiso nobo den mi bida.

Na entrada di e cas, mi a nota dos persona desconoci, cu a acerca. Di e forma aki, pa prome bez den mi bida, mi a topa cu Jossy Mehsen Mansur.

Mi no a keda mucho sorprendi ya cu mi bolbe di Hulanda pa forma parti di un grupo nobo cu lo a introduci un matutino nobo na Curacao, caminda anteriormente mi a dirigi otro publicacion.

Jossy Mansur tabata encarga cu e parti di Aruba den e matutino nobo di Curacao. Hamas mi por a pensa, cu su bishita lo tin un raiz completamente diferente.

Poniendo e matutino nobo, den cual nos dos lo tabata tin interesnan importante, un banda, Jossy Mansur a referi directamente na e matutino cu el a habri na Aruba, DIARIO, cu tabata tin necesidad di un Hefe di Redaccion.

Siendo un ex politico cu participacion activo den gobernacion di Curacao, hamas mi por a soña, cu Jossy Mansur lo a ofrece mi e puesto di Hefe di Redaccion di DIARIO, cu manera el a splica sin perde tempo, mester a hiba Aruba na su Status Aparte.

Destino ta algo incomprendibel manera mi mester a acepta algun siman despues ora mi omo cu tabata parti di e Cuerpo Policial di Aruba a fayece y exigi mi presencia na Aruba.

Den un momento sumamente doloroso, mi a cera conoci cu Aruba, cu un pais carga cu sentimento y emocionnan humano, central den bida di un ser humano.

E calor, e sentimentonan expresa na e momento dor di comunidad di Aruba, a provoca den mi como hende, loke palabra no por describi.

Jossy Mansur y otro miembronan di Redaccion di DIARIO tabata na e entiero y a ofrece mi nan sosten humano.

Anochi mi a realiza un bishita na DIARIO, loke a bira tambe mi prome bishita personal como adulto, na Aruba.

Mi a topa cu Aruba, cu un emocion humano di un Pueblo uni den loke pretencionnan material no por describi.

Dia Prome di Januari 1983, mi a bira parti di e ideal di DIARIO, e obra grandi di bida di Jossy Mansur, cu como autor di buki a skirbi di Aruba, pero pa medio di DIARIO, a compremete su mes pa introduci na Aruba e vehiculo cu Pueblo di Aruba tabata tin mester pa realisa su soño di Status Aparte.

Mi conocemento y experencia internacional pa sirbi e parti tecnico di un matutino, mester a coresponde na e prome exigencia di periodismo, cu ta sirbishi di Pueblo a base di e normanan y balornan di e Pueblo, den cual e cultura y caracter nacional ta central.

Periodismo no ta elevacion di e periodista y su popularidad, pero manera e concepto di Jossy Mansur pa introduccion di DIARIO tabata, e vehiculo pa sirbi e causa autentico di Pueblo cu demostracion di respet pa e nacion!

Respet pa e dignidad di Aruba tabata e motibo cu Jossy Mansur, cu ya tabata un autor internacional ora el a dicidi pa introduci DIARIO, a entrega su mes na servicio di su pais.

Mi pregunta awe ta, con awe ta duna honor na Jossy Mansur, pionero di periodismo autentico di Aruba, cu a ricibi e vehiculo di comunicacion pa diariamente sigui skirbi su historia?

Con awe ta duna honor na Jossy Mansur, pa a sirbi como ehempel pa un nacion, cu a logra loke hasta Reino Hulandes a considera imposibel?

Mi mes persona, prome cu mi a topa Jossy Mansur, a pensa cu hamas Status Aparte por ta realidad, te na e momento cu Jossy Mansur a contagia mi cu e respet pa Aruba como un pais di luchador pa e causa di e Aruba y cuna di hende cu aspiracionnan sagrado, dirigi pa pioneronan manera Jossy Mansur, cu mester ta modelo inolvidabel den historia humano.

Jossy Mansur no ta cu nos mas. Pero e merece di ta parti cu reconocemento oficial den historia di Aruba, cu el a sirbi y entrega e vehiculo pa defende democracia, autonomia y bienestar total di e Arubiano y Aruba!