Jaarverslag 2023 di Ministerio Publico ta mustra riba disminucion di caso penal na Aruba

*Ta revela aparicion di patronchinan criminal nobo 

ORANJESTAD (AAN):   Ministerio Publico di Aruba a publica diahuebs atardi su 'Jaarverslag 2023' y despues di a lesa e rapport anual den e capitulo 2, cu ta trata di investigacion y proceso di caso penal den e fase inicial, ta mustra un cambio importante den criminalidad na Aruba durante e aña 2023.

            OM ta indica cu compara cu 2022, tabata registra un disminucion significante di 28% den cantidad di sospechosonan involucra cu delitonan grave. Sinembargo, ora di observa e casonan relaciona cu menornan di edad, ta nota un aumento leve di 3% compara cu e aña anterior. 

Aumento di delitonan den trafico y aparicion di delitonan sexual 

            Un dato cu a keda notabel ta e aumento grandi den cantidad di hende acusa pa stuur sin rijbewijs. Na 2022, tabatin 716 caso, mientras cu na 2023 e cifra a subi pa 971 sospechoso cu a wordo procesa pa fiscal, un aumento di 26%.  Esaki ta mustra un preocupacion den e infraccionnan di trafico.

            Pa prome biaha, e delitonan sexual a drenta den e lista di e 10 delitonan principal na e isla. E fenomeno aki por ta relaciona cu e proceso di mas conscientisacion den comunidad Arubano, cu a motiva mas hende pa haci denuncia di e tiponan di crimennan aki. Autoridadnan ta kere cu esaki ta un paso positivo den e lucha pa combati delitonan sexual. 

E delitonan mas comun entre menornan di edad

            Relaciona cu menornan di edad, e cinco delitonan mas comun na 2023 tabata:

- Violencia den publico

- Menasa

- Hurto agrava

- Receptacion

- Daño na propiedad

            Ta importante menciona cu e dos prome delitonan a keda mescos cu 2022. Sinembargo, e tres ultimo delitonan a cambia. Mientras cu na 2022 e delitonan predominante tabata relaciona cu droganan 'light', maltrato y posesion di arma di candela, na 2023 e menornan a comete delitonan di robo, receptacion y daño na propiedad a tuma lugar. 

Lucha contra corupcion, un prioridad pa 2023

            Den e plan anual pa 2023, tabata pone enfoke riba lucha contra criminalidad relaciona cu corupcion. E esfuerzonan pa combati corupcion ta esencial pa lucha contra criminalidad cu ta mina e bon orden di comunidad. E principal delitonan di corupcion cu tabata registra ta:

- Soborno activo y pasivo;

- Abuso di funcion publico;

- Falsificacion di documento;

- Fraude;

- Labamento di placa.

            E enfoke riba e delitonan aki ta mustra e compromiso di e autoridadnan Arubano pa combati e crimen organiza y corupcion na tur nivel den sociedad. 

Conclusion

            OM ta conclui cu aña 2023 a trece cambio importante den patronchi di criminalidad na Aruba. A logra un disminucion general den cantidad di sospechosonan relaciona cu delito grave, pero e aumento den caso di menor di edad y aparicion di delitonan sexual den e lista di delitonan mas comun ta mustra cu e autoridadnan mester sigui traha riba prevencion y educacion pa logra mas progreso den mehora di e seguridad na e isla. E lucha contra corupcion ta keda un pilar fundamental den e esfuerzo pa mantene stabilidad y bienestar social.