The content originally appeared on:
Diario
ORANJESTAD (AAN)—Minister Rocco Tjon a reuni cu Sindicato di Polis (SPA),
unda a elabora riba diferente tema, entre otro tocante e problema di mal condicion fisico di e edificio di Scol di Polis.
E mandatario a declara cu e ta contento cu e reunion aki a bay den hopi bon ambiente. Tjon a menciona cu nan a papia extensamente riba e tema di Scol di Polis.
El a indica cu ya caba algun siman atras den e reunion di Korp Management Team, cual el a presencia tambe y cu de vez en cuando e ta participa den dje, pa nan strategia, nan a toca e tema di Scol di Polis y eynan nan a tuma e decision pa haci un “Investerings Project” pa loke ta trata e Scol aki.
“Ya caba e trabaonan aki ta on going pa prepara esaki, cu ta un solucion a largo plazo cu DOW, pa nos por tin e suma y por aloca e fondonan pa renova e scol opleiding por completo” segun e dignatario.
Tambe, los di DOW tin un oferta y e ta indica cu pa renova full e scol di polis ta bay sali alrededor di 1.8 miyon florin. “Pero aworaki, hunto cu DOW nos ta encaminando e proceso ey.
E mandatario a bisa cu un siman prome cu e walk out a tuma lugar, pues Dialuna ultimo, e op-name a wordo haci pa e trabaonan di mantencion por tuma lugar, y e trabaonan aki a wordo ehecuta caba.
Aworaki, e mandatario tin entendi cu loke falta ta dos airco cu mester wordo drecha. Aña pasa a cumpra varios airco nobo pa Scol di Polis y a palabra cu e instancianan concerni, y e trabaonan di limpieza di e dos airconan ta cuminza otro siman.
E minister a indica cu e plan di renovacion completo di Scol di Polis, ta bay tene cuenta tambe cu e parti deportivo, pa training tuma lugar.
