Integridad den gobernacion ta importante pa consolida stabilidad financiero

Parlamentario Evelyn Wever-Croes:

ORANJESTAD (AAN): Lider di MEP Evelyn Wever-Croes den ultimo simannan a elabora extensamente riba e stabilidad financiero di pais Aruba, danki na e fundeshi financiero solido cu Gabinete Wever-Croes a traha duro riba dj’e. “Pero, stabilidad financiero no ta tur cos, integridad den gobernacion ta e yabi pa exito. Si no tin integridad den gobiernacion, e stabilidad financiero lo bay perdi”, segun lider di MEP.   

   Regla y ley tey pa wordo cumpli cun’e. Transparencia ta un obligacion di tur gobernante. P’esey ta asina importante pa Minister Gerlien Croes contesta, for once and for all, e 3 preguntanan tocante e biahe den jet priva: cuanto el a paga, na ken el a paga, y ki dia el a paga. Si e no por contesta e preguntanan aki, e biahe den jet priva ta un regalo, cu segun ley y reglanan di Codigo di Conducta pa Minister, e no a mag di a ricibi. Y esaki ta un violacion grave pa un minister. Riba dj’e, el a gaña Parlamento tambe, cual den hopi pais ta motibo pa e minister baha of wordo baha.

   “Si nos frena e tipo di kiebro di integidad aki awor, lo tin mas avion, boto, auto cu nos lo gara e gobernantenan aki ta purba manipula comunidad y e baho mundo ta bolbe mescla den gobernacion. Aruba no merece esey. Ta p’esey nos di fraccion di MEP ta insisti asina tanto riba e tema aki. Aki bo ta wak tambe un diferencia grandi entre NOS y NAN. Nos ta atende cu casonan asina y nan tin consequencia.

   Nan, esta AVP-Futuro, kier sconde cosnan asina bou tapijt. Ta bon pa AVPFuturo mira ehempelnan na Curacao cu ministernan ta tene honor na nan mes. Como oposicion, nos di MEP lo ta manera un faro den lama, cu luz briyante sendi, pa guia y coregi esnan cu tin e responsabildad awor di maneha nos barco Aruba. Abo como cuidadano di nos pais por conta riba esey.

   Y asina nos lo percura pa e gran logronan di recuperacion, pa surplus pa progreso y bienestar, por yega serca tur ciudadano, pa integridad y transparencia di berdad reina den e gobierno actual y nos lo percura pa e Status Aparte di Aruba, awor despues di 40 aña wordo salbaguardia” Lider di MEP Evelyn Wever-Croes a duna di conoce.