Inscripcion na EPB San Nicolas lo tuma lugar den forma digital y ta importante pa mayornan sa esaki

​

Cabesante Gregory Mathilda:

ORANJESTAD (AAN) Cabesante di EPB San Nicolas, meneer Gregory Mathilda, den entrevista cu DIARIO a expresa cu nos ta yegando na otro final di aña escolar, y aworaki nan ta den e parti unda cu inscripcion ta bay tuma lugar.

   Meneer Mathilda a duna algun informacion tocante e proceso pasobra e no ta bay tuma lugar na mesun forma cu aña pasa, pero e aña aki ta bay haci’e di forma digital.

   Cabesante meneer Mathilda a menciona cu nan a manda carta caba na scolnan, informando kico tur mayornan mester pa prepara nan mes. Por ehemplo, nan mester e registro na Censo, trece papel di 5 florin, e trouwboek unda ta indica ken ta e mayor di e studiante, Zorgpas di AZV of seguro priva y nan ultimo rapport. Adicionalmente, si acaso nan ta voogd, tin cu pone e prueba.

“Hopi importante ta, cu bo tin cu bay riba e website, www.epbaruba.com, y eynan bo ta registra. Anto, den e parti di registracion eynan, bo ta yena tur bo informacion, anto despues di un siman of un siman y mey bo ta haya un contesta y si tur e informacion ta corecto yena, bo ta haya e ora ey e parti unda bo ta bay inscribi y haci pago pa bo yiu por ta inscribi na nos scol”, meneer Mathilda a relata.

Esaki ta specialmente pa alumnonan di scol basico, y tambe pa studiantenan cu ta bin di MAVO. Y tambe pa studiantenan cu ta bin di exterior, nan ta yena esaki.

“E ta hopi importante cu nos ta moderniza, y manera ta conoci scol ta cambiando full den e forma digital aworaki, cu ta bay di biaha den e sistema asina cu nos por tin e material mas apropia y mas nechi”, Gregory Mathilda a señala.

Meneer Mathilda a pidi tambe, na tur e mayornan cu no sa traha digital pa tin un hende cu por yuda nan den e aspecto aki. El a reitera cu nan tin cu zorg pa tin e rekisitonan cu el a menciona prome, pa por wordo yuda, ya cu mayoria di e alumnonan ta hoben, y ta mayor tin cu haci e registracion. “Si acaso bo purba anochi y e no bay, purba un bez mas den dia, y si no, den e carta cu scol a manda pa mayornan scol tin un tipo di helpdesk unda bo por yena e number di telefon ey, caminda cu nos por yuda bo”, meneer Mathilda a indica.

El a señala si, cu preferible mescos cu hende tin cu yena su papelnan ora nan ta bay di biahe, por ehemplo pa drenta Merca, of hasta pa drenta Aruba, tin formulario cu mester yena digital pa wordo admiti akinan, esey scol ta bezig cu ne tambe.