The content originally appeared on:
Diario
Ministro Dangui Oduber ta satisfecho
ORANJESTAD (AAN): Diamars atardi Minister Dangui Oduber tabata invitado na ImSan na San Nicolas pa apertura di e Departamento di “Huisartsen Onder Één Dak”, cu ta wordo yama HOED. Ta cu gran placer y entusiasmo Minister Oduber a atende e evento aki pa mustra e compromiso cu e tin ma mehora calidad di cuido y servicio. HOED lo bay yuda fortifica e prome liña di cuido na Aruba. E ocasion special aki ta significa un paso padilanti den ministerio di salud su compromiso pa mehora e calidad di servicio di cuido di salud disponibel ariba nos pais.
Na Juni 2023 a firma un acuerdo di cuido (zorgakkoord) cual un di e temanan importante tabata pa reenforsa e prome liña di cuido. HOED lo reenforsa e prome liña di cuido y trece mas accesibilidad na nos pashentnan cu mester di e cuido y lo amplia e capacidad pa sirbi mas pashent. Asina aki lo demostra cu esfuersonan continuo di tur den salud publico ta pa keda vanguardia e calidad di cuido na Aruba cu innovacion y exelencia medico.
Minister Dangui Oduber tabata tin e oportunidad di hiba palabra unda el a menciona cu pe ta un honor pa como Minister di Salud Publico presencia e logro aki. el a menciona cu sigur e resultado lo ta un impacto profundo di un servicio di calidad halto cu lo worde ofreci na e aseguradonan pariba di brug.
HOED cu ta “Huisartsen Onder Een Dak” lo bay ofrece servicio consistiendo di 5 docter di cas, 3 docter assistant, 1 persona POH y un VP.
Minister a expresa aprecio profundo pa e dedicacion y contribucion di cada trahado na Imsan. E compromiso cu ta keda demostra unda cada pashent cu ta pasa door di e portanan di Imsan ta ricibi un tremendo servicio y trato medico ta alinea perfectamente cu e vision di ministerio di salud, pa un pais mas inclusivo, inovativo y avansando e servicio di cuido.
E apertura di HOED a demostra un otro accion concreto di minister pa introduci algo nobo pa Aruba su cuido medico. Di e forma aki ImSan ta amplia su servicionan pa nos comunidad. E ultimo 10 simanan a traha hopi duro pa prepara e oficinanan pa nan ta operacional. Un biaha mas minister Oduber a confirma cu accionan concreto e compromiso cu e tin pa eleva e calidad di cuido medico na Aruba.
Minister Oduber a termina su speech dunando felicitacion na Imsan pa yega na un otro logro impresionante y a desea Imsan hopi exito. Na mes momento Minister a gradici tur e docternan cu ta bay cu pensioen, danki na dr. Geerman-Tromp, dr. Every, dr. Lunchman y dr. Boderie. Un palabra di profundo gradicimento pa nan servicio y dedicacion na tur añanan di trabao
