Hopi reaccion pa Food Drive organiza pa Colegio Arubano

ORANJESTAD (AAN): Manera ta conoci, luna di December ta wordo asocia semper como e ‘Temporada di Union y Solidaridad’.

   Den e temporada di fiesta aki, Colegio Arubano hunto cu Rotaract y tambe Key Club den Vondellaan na Playa a uni pa mustra apoyo, amor y solidaridad na comunidad. Esaki ta un momento special pa comparti y yuda esnan den necesidad.

   Pa un siman largo, nan a habri donacion di cuminda pa tur hende cu kier aporta. Cualkier donacion, chikito of grandi, a haci un gran diferencia.  Hendenan a yega cu cuminda den bleki, paki di lechi, tambe lechi pa Baby, buscuchi, iced tea, paki di limonada, pakinan di juice, cornflakes, mac & cheese, pasta, koffie, saconan di aros, saco di Harina P.A.N., saconan di hariña, y muchgo mas.

   Y Rectorado y e alumnonan a keda sumamente satisfecho cu e resultado, demostrando asina cu hunto esnan di Colegio Arubano ta mas fuerte. Cu e contribucion, no solamente ciudadanonan a haci donacion di cuminda, pero tambe a trece speransa y alegria den bida di otro.   Colegio Arubano ta manda mensahe di danki na tur hende pa e apoyo aki.