Polis y Guardacosta a stop un boto cu 8 stranhero indocumenta cu kier a drenta Aruba

The content originally appeared on: Diario

Caso di Diasabra marduga

ORANJESTAD (AAN): Tabata Diasabra den oranan di marduga, cu personal den Radar-Room di Cuerpo Policial, a cuminza sigui un radar-contact cu a aparece ta bin for di zuid, y yegando cu velocidad halto rumbo pa Aruba.

   Mesora a cuminza bati alarma, y asina a notifica tanto Polisnan di San Nicolas, tambe a pone Guardacosta di Caribe Hulandes na altura, y demas instancia pa ta prepara.  Pasobra e radar-contact tabata tumando direccion pa Baby Beach na San Nicolas.

   Vocero policial Lito Lacle di Polis, a indica cu e bon coordinacion entre Cuerpo Policial y demas instancianan, a produci su fruto exitosamente riba Diasabra marduga.  El a describi esaki como un ‘bon cooperacio y cu bon coordinacion.”

   Cu e informacion di radar, Guardacosta a saca nan boto di Metal Shark cu velocidad halto a bay pariba y den un frega di wowo a yega y sorprende un boto Venezolano cu tabata drentando cerca di Aruba.  Cu facilidad a stop e boto di sigui su rumbo, y a wanta tur hende.  Abordo di e boto aki tipo yola tabatin 8 persona.

   Mientras tanto na canto, unidadnan di Polis na San Nicolas a bloke henter e area di Santana di Cacho, Baby Beach, y Rodgers Beach, si acaso un tripulante lo por a landa yega tera.

   Riba lama, autoridadnan a detene e capitan.  Despues di esey a trece e boto cu e nomber ‘Nuestra Primera Vez’ rumbo pa e Pier di Guardacosta di Caribe Hulandes na Savaneta, unda a procesa uno pa uno esnan abordo.

   E capitan a wordo deteni, y entrega na unidad di Crimen cu ta investiga Traficacion Humano.  E demas personanan abordo a wordo pasa pa unidad di Guarda Nos Costa cu tambe a yega, pa asina bay cu nan y percura pa nan wordo deporta bek.

   E boto tambe ta confisca, y ta na disposicion di Ministerio Publico.  Lo bay keda awor na un Huez pa dicidi kico lo haci cu esey.

   Vocero di Polis ta gradici esnan atento di Radar-Room, tambe Polisnan di San Nicolas, y Guardacosta pa e valioso cooperacion.  El a bisa cu e caso ta den pleno investigacion por lo pronto.