Hopi hoben di scol secundario ta bao presion di problemanan na cas y hasta tin cu mester traha pa yuda nan famia

​

Rulienne Arends di FADA:

*Awe nan ta hopi mas habri pa papia riba e temanan aki 

ORANJESTAD (AAN) – Rulienne Arends, Trahado Social Preventivo na Fundacion Anti Droga Aruba (FADA), den entrevista cu DIARIO a indica cu ora nan ta bay scolnan secundario pa duna charla, tin alumnonan cu kier papia cu FADA na final, of cu ta haci cierto preguntanan relata na situacion den nan cas.

Unda cu FADA ta wak mas e problematica ta ora cu scol ta pidi nan bin duna un charla na un grupo cu scol ta wak nan rebeldia cu nan situacion na cas y cu nan por haya nan mes confronta cu un of otro problemanan den futuro; sea ta tema di salud mental of un topico di adiccion tambe. Den e caso aki, Rulienne a bisa, FADA tin e programa di Motivacion (MOTI), cu mayoria di biaha cu no ta haya den nan ambiente na cas. Por ta problemanan na scol mes. “Pero nos a topa tambe cu, por ehemplo, tema di divorcio na cas, un mayor so tey of nan no tey pasobra nan tin cu haci dos trabao y tin hoben cu tambe ta bisa cu por bisa bo tambe, cu door di e situacion na cas e tin cu bay traha y no por dedica full na scol, p’esey por ta scol no ta bay hopi bon”, Rulienne a relata.

El a agrega cu den hopi scol, vooral secundario, FADA tin hopi bon contacto cu nan, unda cu nan ta prepara sesionnan specialmente pa e grupo di hobennan aki, cu mester por ta, extra informacion, extra guia, extra motivacion unda cu e trahadornan preventivo ta combersa cu nan.

Tambe, problema mental den e hoben por crea problema social y tin hoben cu podise ta busca substancia pa gewoon experimenta, of di peer pressure cu tambe ta hunga un rol. Pero esaki no ta kita cu aworaki FADA ta scucha mas problema social cu antes.

“Bo ta scucha cu e hobennan tin mas durf di bisa bo cu e ta uza marihuana pa lubida di e situacion na cas. Nan mayornan ta den divorcio y no ta bayendo hopi bon. E ta bisa cu e no por focus na scol pasobra e tin cu corda cu tin cu bay traha pa e por yuda na cas. Pasobra e hoben ta hopi mas habri awo pa e temanan aki, unda cu nos ta purba yuda nan te na unda cu FADA por”, Rulienne Arends a señala.