Gobierno a absorba mitar di e aumento di prijs di combustibel pa proteha poder di compra

Ministro Geoffrey Wever a confirma

ORANJESTAD (AAN): Diamars mainta Minister di Finansa, Asunto Economico y Sector Primario, mr. Geoffrey Wever a firma e decreto ministerial despues di haya aprobacion di conseho di Minister. E decreto ministerial ta basa riba e desaroyo reciente den prijs internacional di combustibel, a tuma medida concreto pa mitiga e impacto di e aumento riba comunidad y sector comercial.

   Segun e sistematica di prijs, gasolin lo registra un aumento di aproximadamente 49.3 cen pa e luna aki, mientras diesel lo subi cu 83.5 cen. Gobierno ta reconoce cu e subida aki ta significativo y cu e tin un impacto directo riba e poder di compra di ciudadano, e stabilidad financiero di nos hogarnan, y riba e operacion di empresanan, specialmente esnan cu ta depende di diesel pa transporte y logistica.

   Den noticiero na radio, Minister mr. Geoffrey Wever a comparti cu den e marco aki, Conseho di Ministra a aproba pa Gobierno absorba mitad di e aumento di gasolin y mas o menos mita di e aumento di diesel. E decision aki ta dirigi riba proteccion di poder di compra y sostenibilidad economico, pa limita e presion riba prijs di producto y servicio den nos economia, pues pa mitiga e aumento di “the cost of doing business”.

   Cu e intervencion di Gobierno, e aumento real pa consumidor lo wordo reduci significativamente. Sin medida, gasolin lo subi cu alrededor di 49.1 cen, mientras cu cu intervencion e aumento ta limita na aproximadamente 24.57 cen. Pa diesel, e aumento lo wordo reduci di 83.5 cen pa alrededor di 45.20 cen.

   Minister Wever, den colaboracion cu institucionnan relevante manera Banco Central di Aruba, CBS y RDA, ta sigui monitorea e desaroyo economico y internacional di cerca. Analisisnan indica cu e aumento actual tin un caracter temporal, y Gobierno lo sigui evalua e situacion pa determina paso adicional si necesario.

   Segun Minister Wever e costo di e medida pa Gobierno ta estima na aproximadamente 2.5 miyon Florin pa luna, cu 1.5 miyon asigna pa gasolin y 1 miyon pa diesel. Den e contexto aki, tambe a tuma decision pa re-prioritisa gasto publico y crea un buffer pa adresa e crisis internacional. Mientras cu cierto proyectonan lo sigui, otro proyectonan lo wordo pospone pa 2027 pa crea e espacio financiero necesario pa sostene e medida nan actual.

   Gobierno ta enfatisa cu e aumento di prijs di combustibel no ta resultado di factor local, sino di desaroyo internacional fuera di control directo di nos economia. Precisamente pa e motibo aki, Gobierno ta considera su participacion como esencial pa proteha ciudadano y economia.

   “Desde e promer dia, mehoracion di poder di compra di ciudadano ta un di e prioridadnan principal di Gobierno. E medida aki ta confirma e compromiso continuo pa sostene comunidad y asegura stabilidad economico den un periodo di incertidumbre global” Minister Wever a subraya.

   Awe Gobierno lo amplia riba e topico aki y informa comunidad durante un conferencia di prensa oficial, unda lo wordo presenta e ahuste presupuestario y e strategia pa e bienestar di Pais Aruba.