The content originally appeared on:
Diario
Topico economico DIARIO mas relevante di 2023 realidad na Aruba
*Region di Caribe economicamente hopi dependiente di gas y azeta
*Aruba ta posiciona su mes entre combustibelnan di awe y mañan
ORANJESTAD(AAN)—Periodismo na 2023 tabata tin exigencianan sumamente importante pa motibo cu na 2023, mundo mester a enfrenta realidadnan pa cual pa hopi tempo e no kier a yega na decisionnan.
E hecho cu na 2023, defensa di Europa y necesidad pa paisnan militarisa y gasta placa na arma a bira factor principal den maneho, tabata uno di e puntonan pa cual DIARIO a adverti.
Otro di e desaroyonan sumamente importante pa Aruba, tabata e salida di petroleo for di panorama economico mundial y e ilusion di mundo cu na 2050, gas y petroleo por a wordo geschrap for di lista di combustibel di paisnan.
Durante e ultimo lunanan di 2023, DIARIO diariamente tabata presenta na Aruba e realidad riba e problema serio cu salida di petroleo a bira y cu a haya expresion sigur na e Conferencia di Clima, cu pa prome bez den historia mester a wordo prolonga, pasobra mundo no por a yega na un acuerdo riba e forma cu ta baha consumo di combustibel di origen fosil, manera gas y petroleo.
Di e forma aki ya DIARIO a haya razon den su spiertamento, cu gas y petroleo no por wordo geschrap sin mas for di e realidad economico mundial, sigur si tene na consideracion cu pa paisnan chikito, salida di gas y petroleo lo a bira final di nan economia.
Final di 2023 a conoce un mundo cu ainda no por yega na un conclusion kico ta bay haci sigur cu gas.
Mas y mas lidernan mundial mes a cuminsa splica cu no ta sin mas ta bandona sigur gas, cu ta contene menos riesgo cu petroleo.
DIARIO a cera 2023 cu informacionnan importante riba e cambionan cu lo tuma lugar riba tereno di combustibel y riba cual mundo ta traha.
Na e momento cu Aruba awor ta wordo selecta pa, mescos cu ta pasa pues na cantidad di pais, exploracionnan tuma lugar riba exploracion di gas y petroleo den awanan teritorial di e pais, ta deber di DIARIO di splica Aruba mas riba e topico aki.
Gas ta wordo considera e facilidad pa bandona e era di combustibel fosil y ta un necesidad pa mundo, cu sin mas no por deshaci di tur su facilidadnan energitico basa riba gas y petroleo.
Mundo mester keda operacional, mientras sigur na e momentonan aki Aruba ta posiciona su mes riba lista di paisnan cu no sin mas ta bolbe na ayera.
Si gas wordo descubri bou awanan teritorial di Aruba, esaki sigur lo sostene e industrianan di Aruba cu a dicidi pa gas, mientras na mes momento Aruba ta bira ehemplar pa e situacion mundial real, caminda gas ta wordo uza mas y mas pa e fase di transicion pa energia limpi, cu na Aruba mester wordo produci pa medio di hydrogeno.
Cientificamente ta wordo trata pa deshaci mas y mas di e elementonan peligroso di gas.
Actualmente mundo ta pasa den un etapa di estudio cientifico enorme riba tereno di combustibel necesario pa industrianan y mantencion economico mundial.
Te ainda, manera ta bon conoci, transportacion mundial ta depende di producto petrolero loke ta nifica cu transicion sin bon guia lo tin impacto total riba comercio mundial.
E hecho cu Gobierno Wever-Croes tabata ehemplar riba e tereno cu nan a trata e produccion di energia na Aruba, sigur ta haci cu Aruba ta den un posicion unico pero tambe sumamente importante en bista di e realidad economico di Aruba cu ta depende di duna servicio na entre otro turista na tera, awa y laman.
E diferente etapanan cu combustibel mundial lo conoce, ta representa na Aruba y lo wordo ensancha cu exploracion di gas den e awanan teritorial di Aruba cu tambe atrae base energitico di hydrogeno cu ta wordo considera e solucion pa futuro.
Por bisa pues cu Gobierno Wever-Croes a staciona Aruba entre e fuentenan energetico di awa y futuro, cu ta sumamente importante pa base economico di e pais.
