The content originally appeared on:
Diario
ORANJESTAD (AAN): Plantanan saludabel ta constitui e fundeshi pa tur bida riba planeta Tera y
alaves pa tur funcionnan di ecosistema, seguridad alimentario y nutricion, Salud di planta ta esencial pa e desaroyo sostenibel di agricultura rekeri pa cumpli cu e demanda pa alimenta un poblacion mundial creciente pa 2050.
Planta ta representa bida: nan ta provee 80% di tur alimento cu nos ta come y ta genera 98% di e oxígeno cu nos ta respira. Pero biahamento y comercio internacional ta responsabel pa introduccion y propagacion di plaganan di planta. Especienan plaga y invasor ta forma un di e motornan principal di perdida di biodiversidad y ta menasa e delicado red di bida cu ta sostene nos planeta.
Plaganan y malesanan di planta tambe ta surgi a consecuencia di aumento di temperatura debi na cambio climatico, locual ta crea niche nobo den ecosistema pa plaga por colonisa y propaga. Como respuesta, lo por aumenta uso di plaguicida, locual ta perhudica y hasta por mata especie polinisador, entre otro abeha, enemigo natural di e plaganan y organismo crucial pa un medio ambiente sano. Ta esencial pa proteha e salud di plantanan promoviendo practica cu no ta causa daño na medio ambiente, manera maneho integral pa combati plaga.
Riba 6 December 1951 a firma e Tratado Internacional pa Proteccion di Planta (International Plant Protection Convention-IPPC) y e tratado aki a introduci norma (standard) internacional pa medidanan fitosanitario (International Standards for Phytosanitary Measures-ISPMs) pa aplicacion den comercio internacional pa yuda preveni introduccion y propagacion di plaganan di planta a traves di fronteranan.
E ISPMs hunto cu e Codex Alimentarius di Food and Agriculture Organization pa seguridad pa consumo di cuminda y e standardnan pa salud di animal di World Organization for Animal Health ta forma e tres pilar pa sector primario (agricultura, cria y pesca) pa combati malesa y plaga y percura pa seguridad pa consumo di cuminda.
20 December 2018 Asamblea General di Nacionnan Uni a adopta resolucion A/RES/73/252 proclamando 2020 como Aña Internacional di Salud di Planta y ariba 29 Maart 2022 a adopta resolucion A/RES/76/256 designando 12 mei como Dia Internacional di Salud di Planta.
2024 TEMA: SALUD DI PLANTA, COMERCIO SIGUR Y TECNOLOGIA DIGITAL
E tema pa 2024 ta “Plant health, safe trade and digital technology”, esta “Salud di Planta, comercio sigur y tecnologia digital”.
Cada aña mas di 240 miyon container ta circula entre paisnan na mundo, transportando mercancia manera productonan vegetal, cual ta plantea riesgonan di bioseguridad
Ademas, alrededor di 80% di e cargamentonan ta uza productonan traha di palo pa empaketahe y embalahe (p.e. palet y caha) locual ta presenta un perfecto via di transporte pa plaga.
Como consecuencia, e dañonan causa pa especienan di plaga invasor ta monta na un perdida economico mundial di aproximadamente 220 biyon USD. E ta esencial pa proteha salud di planta atrabes di fronteranan mediante colaboracion mundial y normanan internacional.
Pesey e Secretariado di eTratado Internacional pa Proteccion di Planta, usando e Normanan Internacional pa Medida Fitosanitario (International Standards for Phytosanitary Measures) a crea un aplicacion innovador, un certificacion fitosanitario electronico, yama ePhyto, cu ta agilisa e proceso y ta haci cu e comercio ta mas rapido y sigur.
Mediante ePhyto, ta habilita paisnan exportador pa presenta na paisnan importador informacion riba e calidad fitosanitario di nan productonan, casi den tempo instantaneo (real-time). E solucion ePhyto ta haci comercio internacional di planta y producto vegetal mas lihe, mas sigur y directo door di elimina complicacion di uso di certificado di papel, manera por ehempel retraso di tramitacion y uso di certificado fraudulento.
Bentahanan di utilisacion di tecnologia digital ta:
Mantene planta sano lo proteha fuentenan di alimento contra plaga y malesa dañino incluyendo daño na e productonan mas exporta mundialmente manera bacoba, koffie, druif, olijfie, batata, trigo, maishi y aros.
Comercio sigur di cultivo di agricultura ta sigura disponibilidad di diferente fuente di alimento.
Proteha salud di planta ta yuda promove sistema di agricultura sostenibel.
Preveni introduccion y propagacion di plaga di planta ta yuda proteha flora local, medio ambiente y biodiversidad biologico, economianan y porvenir.
E introduccion y propagacion di plaga di planta por ser preveni mediante un comercio sigur, incluyendo via comercio en linea.
Proteccion di salud di planta por ser logra cumpliendo cu normanan internacional fitosanitario.
Practica di comercio sigur ta yuda preveni e propagacion mundial di plaga di planta cu ta degrada biodiversidad y ecosistemanan.
Practica di comercio sigur ta sigura calidad y integridad di productonan vegetal comercia, asina promoviendo stabilidad y crecemento economico.
DIA INTERNACIONAL DI SALUD DI PLANTA, SITUACION DI ARUBA
Aruba tambe ta keda afecta pa plaga y maleza di planta. Na 2009 nos a keda invadi cu e insecto plaga “Red Palm Weevil” importa cu especie di palma usa den landscaping di hotelnan nobo den construccion y hotel existente. Hopi palma den area publico, comercial y residencial a keda afecta.
Di e cultivonan importa cu mas peliger ta corre di ser afecta pa fungi, ta resalta bacoba y banana.
Recientemente Santa Rosa Aruba a anuncia cu e presencia di e fungus cu ta causa Fusarium Wilt of Bananas and Plantains- Tropical Race 4 (TR4) a ser confirma na Colombia.
Y e oficina di e IPPC a confirma e presencia tambe na Venezuela y den un comunicado di 21 februari 2023 ta anuncia sosten pa maneha e presencia di TR4 na Venezuela cu ta menasa cultivo di bacoba y banana na Venezuela y consecuentemente seguridad alimentario di nos pais bisiña.
Venezuela a declara un emergencia nacional fitosanitario pa por combati TR4, pero recursonan humano y financiero ta limita y a pidi asistencia di comunidad internacional.
Awor cu frontera maritimo cu Venezuela a keda habri e riesgo di introduccion di e malesa aki na Aruba for di Venezuela y Colombia ta real, y tambe e introduccion di plaganan.
Planta y producto di agricultura importa manera fruta y berdura por introduci plaga y especie invasor di cual fungi (biskem) y algun bacteria por tin efecto desastroso riba entre otro cultivacion di maishi y fruta manera entre otro lamoenchi.
E problema cu inspeccion di producto vegetal importa ta cu esakinan ta ser inspecta mas tanto visualmente y cu control di documento di importacion. Frecuentemente esaki no ta suficiente pa evita importacion di plaga.
Gobierno di Aruba tin cu implementa mas pronto posibel un maneho adecuado fitosanitario pa enfrenta TR4 y otro plaga y malesa di planta como parti integral di maneho di agricultura na Aruba, y considera utilisacion di aplicacion manera ePhyto..
