Entrante aña 2024 pensionadonan ta paga menos na prima di AZV

​

Pa doñonan di trabao y pensionadonan

Pensionadonan ta paga 5% riba e prome 30.000 Florin di entrada 

ORANJESTAD (AAN): Departamento di Impuesto ta informa tur pensionado y nan doño di trabao, cu entrante aña 2024 e prima di AZV ta worde reduci pa e pensionadonan cu tin e edad di 65 aña of mas.

   Te cu aña 2023, e pensionadonan tabata paga 6,5% riba e prome Afl. 30.000 di entrada of salario (di un empleo den pasado). Si e entrada of salario aki sobrepasa Afl. 30.000 pa aña, e pensionado ta paga 10,5% na prima di AZV riba e suma restante. Awor entrante 1 di januari 2024, e porcentahe riba e prome Afl. 30.000 di entrada ta baha na 5%. Pues un reduccion di 1,5%.

   Na januari ultimo, conforme decision di Conseho di Ministro, Departamento di Impuesto a anuncia cu e porcentahe a worde reduci y a bira 5,5%. Mientrastanto e decision a worde adapta y e porcentahe a worde stipula na 5% entrante 1 di januari 2024.

   Entrada maximo pa cobra prima di AZV:  E entrada maximo pa cobra prima (premieloongrens of premie-inkomen) di AZV no ta cambia y ta keda Afl. 85.000 pa aña 2024. Esaki ta nifica cu si e salario of entrada di un pensionado sobrepasa Afl. 85.000, e ta paga e suma maximo di Afl. 7.275 pa aña na prima di AZV. E prima maximo te cu aña 2023 tabata Afl. 7.725. Pues, un reduccion di Afl. 450 pa aña.

   Ehempel:

   Premieloongrens of premie-inkomen ta 54.000 Florin.

   Calculacion di prima di AZV 2024:

5% riba 30.000 ta Afl. 1.500
10,5% riba 24.000 (54.000-30.000) ta Afl. 2.520

    Den e ehempel aki riba e pensionado lo paga total Afl. 4.020 na prima di AZV den aña 2024.

    Pa tur otro persona: Pa tur otro persona cu no ta pensionado (di edad te cu 64 aña) no tin cambio. E premieloongrens of premieinkomen di aña 2024 ta Afl. 85.000 pa aña y e porcentahe maximo ta 10,5%. E prima di AZV ta maximo Afl. 8.925 pa aña (85.000 x 10,5%).

   Departamento di Impuesto ta haci un suplica special na e doñonan di trabao pa tene cuenta cu e cambio di porcentahe ora cu calcula e prima di AZV di un pensionado pa asina por retene e suma corecto.