The content originally appeared on:
Diario
ORANJESTAD (AAN): Diaranson merdia, e actual Miss Teen Aruba International 2023,
esta Emilly-anne Aishme Andrews a sali cu un delegacion rumbo pa Colombia pa participa den e certamen di Miss Teen Grand Universo 2024.
Esaki ta un certamen internacional hopi popular y di halto nivel, cu GLW Foundation di Aruba ta participa na dje. E certamen mes lo bay ta Diamars dia 27 di Februari 2024 na Cartagena, Colombia. Lo bay tin participacion di mas di 45 hoben di diferente pais, participando den tres categoria.
Emilly-anne Andrews ta embahadora di hubentud di Aruba, y el a declara den entrevista na DIARIO cu el a bin ta preparando extensivamente ultimo lunanan pa e tarea grandi aki, y su participacion den categoria Miss Teen Grand.
“Mi ta basta prepara,” Emilly-anne a declara. “Esey ta danki na mi mama y tata, rumannan, famianan, Tio George, y amigonan cu a yuda den esey, y e preparacion a bay basta bon.”
El a sigui bisa: “Mi ta sintimi basta bon prepara, danki na tur esnan cu a dunami sosten, a yudami por sinti mi mes bon pa bay den exterior pa representa Aruba.”
Segun Emilly-anne a splica, pa e certamen aki e mester a traha y edit na Aruba varios videoclip, por ehemplo uno di nan tabata pa mustra su amor pa yuda muchanan. Tambe el a traha un video caminda el a indica su entusiasmo pa duna guia na demas hobennan. “Esey tabata basta leuk pa mi,” Emilly-anne a indica. Tur esaki pa mustra e mensahe ‘humanitario’ di cada candidata den e certamen aki.
Den categoria di Miss Teen Grand 2024, tin mas di 20 candidata participando, y nan lo ta activo na Cartagena for di 21 te cu 28 di Februari 2024.
Uno di esnan cu a viaha cu e delegacion tabata George Winterdaal di GLW Foundation, y el a declara na DIARIO cu esaki ta di dos biaha cu Aruba ta participando.
El a corda tur hende cu na aña 2022, ya caba Aruba a yega di participa na Miss Teen Grand Universo, y e tempo aya e candidata Elizabeth Johnson a logra obtene e titulo di Virreina.
George Winterdaal di GLW Foundation a indica na DIARIO, cu Aruba ta bayendo pa busca sea e corona mes, of esun di virreina atrobe.
DIARIO a compronde cu di Curaçao tambe tin e candidata Liyanne Hoevertsz participando, y di Bonaire lo tin Angeliz Gerder.
