E espacio na Lagoen pa practica di deporte di Boto Miniatura a wordo kita

Clifford Rosa, director di Fundacion Rancho:

Ya no tin gazebo mas 

ORANJESTAD (AAN)-- Director di Fundacion Rancho, Clifford Rosa, den entrevista cu DIARIO, a comenta cu pa carera di boto (miniatura), normalmente nan ta banda di lama, pero e bez aki el a mira e desaroyo for di Biblioteca Nacional. El a duna di conoce cu e practica cultural intangible di hunga boto, a wordo kita!

   “Pero nos ta wak e desaroyo cu tin eybanda tambe; awo  no tin gazebo mas, y esey tambe ta haci cu un di e espacionan cu hendenan por a bay practica e herencia cultural intangible aki, hunga boto, a wordo kita”, Clifford Rosa a señala.

El a agrega cu esey ya caba a duna un contesta cu mester di mas informacion y mas empuhe tambe pa mira con nan por yega na un lugar bek, unda cu capitan, participantenan y nan famia por yega eybou, cu tin un sombra cu nan por haci parti di loke ta nan herencia di, eigenlijk, hunga boto.

   Rosa tin entendi cu e motibo di esaki ta, cu gobierno ta bezig cu embeyecimento pa turismo.

   “Pues esey lo tin di haber cu ATA, cu ta esun cu ta trahando tur e gazebonan cant’i di e costanan na Aruba, y tambe ta un di esunnan cu lo a financia e proyecto aki, cu mester bin eynan, pero kico e lo ta te ainda nos no sa”, Clifford Rosa a relata.

   El a duna di conoce cu e Fundacion a acerca puntrando aworaki kico e proyecto tin riba e brug na Lagun, cu ta conecta di biaha na e beach, y pa nos ta importante kico lo por pasa y kico ta mehoracion. “Nos ta mira e renovacion di e monumento na e piscadornan cu ta perdi, y nos a premira cu lo por tin mas desaroyo positivo den e banda ey pa nos comunidad”, Clifford Rosa, Director di Fundacion Rancho, a señala.