E ‘Cas di Studiante’ lo aporta na e vision di Gobierno di Aruba cu ta revitalizando e centro di ciudad

​

Parlamentario Ricky Hoek (MEP):

ORANJESTAD (AAN): E vision di Gobierno di Aruba pa haci centro di ciudad di Oranjestad un oasis di vivienda y tienda pocopoco ta haya su realisacion, Parlamentario Ricky Hoek di Fraccion di MEP a expresa.

            Minister Geoffrey Wever cu ta encarga cu e realisacion di e vision aki, a desvela un proyecto nobo den centro di cuidad. 

Prome Cas di Studiante

            Gobierno di Aruba ta propietario di algun edificio den centro di ciudad, di cual algun no ta den uzo. Pa preveni cu e edificionan lo deteriora, Gobierno ta sondea diferente posibilidad di uzo pa e edificionan.

            Asina Gobierno di Aruba den colaboracion cu Fundacion Cas pa Comunidad (FCCA) a yega na un acuerdo cu lo construi un ‘Cas di Studiante’ (studentenflat).

            Pa esaki por bira posibel, Hoek a sigui bisa, Gobierno di Aruba a traspasa e edificio di ex Ministerio Publico pa FCCA. Na nan turno, FCCA lo inverti un suma di 4,5 miyon florin pa converti e edificio menciona den un ‘Cas di Studiante’ cu lo consisti di 19 camber y 3 espacio comercial.

            Tur studiante cu ta interesa pa biba independiente y establece nan mes den centro di ciudad tin e posibilidad pa haci esey den Aruba su prome ‘Cas di Studiante’ (studentenflat). 

Revitalisando centro di ciudad

            E parlamentario a agrega cu e ‘Cas di Studiante’ cu lo bin den centro di ciudad lo aporta na e vision di Gobierno di Aruba cu ta revitalizando e centro di ciudad. Banda di e proyecto nobo aki, Gobierno di Aruba a renoba e edificio di Aruba Fair Trade  Authority (AFTA), a muda FREEZONE pa centro di ciudad, y tambe a cuminsa cu renobacion di Cas Veneranda.

            Pronto departamentonan di gobierno BIA y SEDECO tambe lo muda pa e edificio di ex-Interbank. Y asina tin algun proyecto mas den ‘pipe-line’ cu Gobierno di Aruba lo bay realisa.

            Gabinete Wever – Croes II ta conciente cu tin varios trabou pa haci den centro di ciudad, pero e tin e debido atencion pa desaroyo di centro di ciudad y ta haciendo su maximo esfuerzo pa concretisa su vision pa haci di centro di ciudad un oasis di vivienda y tienda, asina Parlamentario Hoek a finalisa bisando.