E cartera di Asuntonan di Adulto Mayor ta esun cu a “touch” e curason di minister Arends

Un lider comprometi cu Adultonan Mayor:

ORANJESTAD (AAN) – E cartera cu mas a “touch” e curason di Minister Ursell Arends ta esun di “Asuntonan di Adulto Mayor”. Den e entrevista aki cu DIARIO, e ta conta di con e cartera aki ta "deep" den su curason.

            Tin mas di 28 mil adulto mayor cu ta forma parti di nos comunidad, y hopi di nan ta biba den isolacion y soledad. “Nan ta nos tesoronan, nan ta esnan cu a construi e Aruba cu nos ta hereda awe. Ta nos deber pa garantisa nan un bida digno, y bon calidad di cuido ora ta necesario”, Minister Arends a expresa.

            Su prome logro ta cu pa prome bes den historia di Aruba tin un Ministerio pa Adulto Mayor. “Nos tin  un departamento di Asuntonan di Adulto Mayor, cu ta representa e interes di tur e adultonan mayor, y alaves nos a organisa dos forum nacional pa Adulto Mayor y asina a trece tur stakeholder hunto pa traha na bienestar di adulto mayor. For di e foro nos a firma un Convenio cu mas di 25 instancia, cu a compromete nan mes di traha den union pa surpasa tur e retonan cu nos adultonan mayor ta encontra”, Ursell Arends a señala.

            A institui un proyecto Pasadia, cu ta atende cu e lista di espera di e adultonan mayor cu mester drenta den cas di cuido, pero alaves trece un alivio na e cuido informal, familiar y amistadnan di adulto mayor. “E proyecto Pasadia ta brinda oportunidad na e adulto mayor na actividadnan pa mantene nan activo y tambe socialisa cu otro adulto mayor. Na e pasadia tambe nan ta haya un cuminda cayente”, e lider di RAIZ a expresa.

            Telefon pa Adulto Mayor: “Telefon pa Adulto Mayor 125 ta un cumplimento hunto cu Club Kibrahacha. E ta dunando resultadonan positivo caminda e adulto mayor por yama y papia cu e boluntarionan pa haya informacion, of djis pa sostene un combersacion y asina nos ta combati soledad.        RAIZ ta e sirbido di nos adultonan mayor y den e proximo gabinete nos lo sigui construi riba e fundeshi solido cu nos a desaroya”, Minister Arends y lider di RAIZ a señala.