The content originally appeared on:
Diario
Segun e bos di Gerencia:
ORANJESTAD (AAN) — Di parti di Gerencia d SVGA, relaciona cu e walkout di Diahuebs mainta, nan a duna di conoce cu nan tambe ta hopi demotiva, pasobra nan ta bringando pa hopi aña caba pa nan por haya un miho subsidio, pa nan por paga indexering na e trahadornan.
Nan ta conciente cu e trahadornan tambe tin derecho, y ora cu a cambia e forma di subsidio, Gerencia a haya un carta di e minister di e tempo ey, a bisa cu nan ta keda cu nan derecho.
E tempo ey tabata e Minister di Finanzas y di Sociale Zaken, y nan a haya un carta di dje na Augustus 2017, bisando cu nan ta keda cu nan derecho ora tin cambio di sistema di subsidio. Gerencia ta bisa cu semper nan ta entrega nan presupuesto. Ora cu nan a tende cu trahadornan di gobierno ta bay haya indexering nan a bisa: “nos tambe tin derecho” pasobra semper nan tabata tin derecho y aworaki tambe. Na Juni nan a tende di Minister Presidente cu nan por haya indexering pero mester aplica p’e. Anto nan a keda warda un tiki pa wak ora e aplicacion di gobierno yega, pero el a bira hopi largo. E ora ey dia 2 di Juli GVGA no a warda mas y nan mes a manda un carta, cu tur informacion di nan salario, etc., y pa paga e 6.2% pero nan no a tende nada mas.
Diamars ultimo, Gerencia a haya un informacion di Minister, sin mucho splicacion con pa aplica pa e subsidio pero cu nan mester cumpli cu e subsidieverordening. Tur esey nan a cumpli cu ne caba, y a caba di manda prueba cu ta cumpli cu tur rekisito pa tin derecho riba indexering. Pero e Bestuur no por dicidi di duna nan trahadornan si nan no tin e garantia di gobierno cu nan ta paga awo un extra suma, pa paga e trahadornan.
E aña aki mester di 204.000 y algo extra pa paga indexering na tur trahado y pa 2025 e ora ey ta doble, plus loke mester bin acerca na Januari cu ta e 6%. Pues pa nan por paga, segun e CAO, mester di un suma extra y Gobierno mester compronde cu SVGA mester di dje pa nan por paga su trahadornan.
