The content originally appeared on:
Diario
ORANJESTAD (AAN): Por bisa cu ya Fase 1, Fase 2, y Fase 3 di e renobacion di Lloyd G. Smith Boulevard dilanti Highrise Hotelnan a keda cla.
Esey ta e pida for di dilanti RIU Palace Antillas Hotel bay nort te na e entrada pa parkinglot di The Village Mall.
Awor ta e pida bay nort ey, te na e T-weg grandi banda di Gianni’s Restaurant ta na turno, como cu nan ta cay bao di Fase 4. Nan ta bira e ultimo Fase tambe di renobacion pa 2024, como cu High Season ta yegando y lo no bay ta trahando durante e temporada ey.
Fase 4 a start riba Diahuebs caba, y a cuminza kita e asfalt y e banchinan existente. E pida Fase 4 aki lo bay pasa den mesun proceso di saca tubonan bieu, instala nobo, nivela e caminda, pone refuerzo bao dje, prome cu pone banchi nobo y asfalt cu capa diki. Tur esaki lo dura 11 siman.
DOW y contratista ta haci suplica na chauffeurnan, principalmente empleadonan pa no para riba caminda, como cu e ta sigui wordo usa pa move heavy equipment.
