The content originally appeared on:
Diario
Caso di asesinato na Matividiri
ORANJESTAD (AAN): Diaranson un muher y un homber ta presenta dilanti Hues como sospechoso di e asesinato cruel di difunto Sergio Maduro, un miembro di CEA. E asesinato a sosode 24 December 2023 y a trece preocupacion pa varios dia den pueblo.
Informacion cu DIARIO a haya ta mustra cu awe merdia 2’or, e muher di fam Gonzalez y e homber di fam Jimenez nan caso “pro forma” ta tuma lugar.
“Pro forma” ta nifica cu e sospechosonan ta presenta dilanti Hues pero no ta bay tin tratamento completo di e caso. Hues lo bay stipula un fecha pa tratamento di e caso. E motibo cu mester haci caso “pro forma” ta pasobra cu ley ta stipula cu dentro di un periodo, sospechoso di un delito mester presenta dilanti un Hues. Si no haci esaki, esaki ta un violacion di ley cu por causa cu mester laga e sospechoso liber.
Asesinato cruel: E acusacion contra Gonzalez y Jimenez ta cu riba bispo di Pasco, 24 December 2023, nan a choca e victima Maduro cu forza y despues draai su nek varios biaha di robez pa drechi. Tambe nan a keda wanta/lock Maduro su garganta cu forza y despues push’e bent’e for di e auto na Matividiri, y despues nan a pasa auto riba Maduro diferente biaha.
Ta sospecha cu Gonzalez cu tabata e pareha di Maduro, ta esun cu a pidi Jimenez pa yude bay mata Maduro, door di priminti’e cierto pago, y el a hasta paga un adelanto tambe na e homber
Ta un caso hopi cruel cu ta pone bo corda riba un caso similar cu a sosode na Zeewijk. Lo informa ki fecha Hues lo dicidi cu tratamento di e caso aki lo tuma lugar.
