The content originally appeared on:
Diario
Bunita logro di Fundacion FAA
Nan a duna discurso dilanti delegadonan internacional
ORANJESTAD (AAN): E participacion di 2 hoben autista di Aruba, hunto cu 2 mayor procedente di e isla aki na e foro internacional yama ‘Call to Action” na sede di Nacionnan Uni na New York, a tuma lugar riba Diahuebs.
Esaki tabata un momento special sigur pa e organisacion di Autism Foundation of Aruba, cu a haya chens di laga e dos hobennan autista Byron Lesire y Kay Quandus duna nan mesun discurso na tur e delegadonan presente na e foro importante aki. E ta ademas parti di nan meta pa concientisa mas hende, pa trece cambionan sistematico pa cu e bienestar di individuonan cu ta riba e spectrum di autismo.
Di parti di mayornan cu a papia tabatin Stephany van der Biezen-Croes, como tambe president Carolina Thiel-Span di Fundacion FAA. Tabata presente tambe e simpatica dama Raquel Lesire como sosten principal.
Cada delegado internacional cu a participa, a trece dilanti con nan pais ta trata e dificultadnan rond di Autismo. Ora cu e dama hoben Kay Quandus a papia, henter a sala a para keto pa asina scucha loke el a trece dilanti den su discurso, presenta den Ingles perfecto y relatando su lucha pa trata na domina e dificultadnan enfrenta cu Autismo.
E hoben Byron Lesire di 24 aña tambe a cuminsa papia despues cu un voz sumamente bon articula na Ingles, di e retonan cu el a topa cune, di su hobby, y su deseonan. DIARIO a logra obtene discurso di cada uno di nan, y lo presenta esaki na lectornan den dianan venidero.
Carolina Thiel-Span di Fundacion FAA, a mustra con 53% di famianan cu hende cu Autismo na Aruba a admiti cu nan ta lucha pa por logra haya asistencia esencial di salud pa nan yiunan autista. Como 70% di e famianan aki a bisa, cu e cobertura medico na Aruba no ta trata esakinan, y a splica con 72% a admiti di ta profundamente y emocionalmente afecta pa e realidad aki.
