The content originally appeared on:
Diario
ORANJESTAD (AAN): Tabata Diabierna anochi banda di 9:00 pm, cu dos delincuente na San Nicolas a hinca den nan cabes pa bay atraca Gasoline Station di Citgo,
cu ta situa exactamente 80 meter leu for di e portanan di Warda di Polis San Nicolas.
Trahadornan na e Gasoline Station a keda sorprendi, ora cu dos hoben full bisti na preto a yega cu hopi insistencia riba nan. Nan tabatin un arma di candela den man, pa asina cuminsa exigi e botin.
Sinembargo debi na nervio di tabata cerca di un Warda di Polis, y cu e momento ey tin hopi trafico moviendo, na final e dos delincuentenan a dicidi bay man bashi. Pues no a ni logra 1 Florin.
Pero yamadanan a drenta mesora na Central di Polis di e atraco aki, y agentenan di San Nicolas a reacciona basta rapido. Nan a hasta start un persecusion tras di e atracadornan fracasa, sinembargo den scuridad di anochi y pasando den tur e hanchinan di San Nicolas, autoridad a perde nan fo’i bista.
Atraco Team a worde poni na altura y mester a presenta na e Gasoline Station pa tuma dato y trata na gara e dos atracadornan aki cu mas cu claro ta un menaza pa comunidad.
