The content originally appeared on:
Diario
Setar orguyoso di sostene Festival Un Canto pa Aruba
ORANJESTAD (AAN): Siman a habri, y Setar NV como nos compania nacional di Telecomunicacion, ta orguyoso di por contribui na e Festival di Un Canto pa Aruba su Himno y Bandera Infantil, Hubenil y Adulto conhuntamente cu Comision Celebracion Dianan Nacional, Comision Promove Cultura, Fundacion Cultural di Festival Folklorico y demas partnernan.
Luna di Maart ta den cuminsa, y esey ta nifica cu tur hende ta cuminsa sinti nan mes mas patriotico y cu amor mas dirigi riba cultura di e isla. Durante un conferencia di prensa convoca na edificio principal di Setar NV, a papia riba e rol cu e compania ta tumando den promove e aspecto cultural den comunidad.
E Festival mes di Un Canto pa Aruba ta tuma luga diabierna y diasabra awor na Plaza Betico y ta conta cu un gran participacion den tur tres categoria.
Diabierna riba Plaza Betico lo tin e Festival pa Adulto, organisa pa Fundacion Cultural di Festivalnan Folclorico. Diasabra riba Plaza Betico lo tin e Festival pa Infantil y Hubenil, organisa pa Comision Promove Cultura. Tur esaki lo cuminza pa 6:00 pm.
Jessica Croes di Fundacion Cultural di Festivalnan Folclorico a splica cu pa 2024 nan ta yegando na di 27 actividad anual di Festival di Un Canto pa Aruba su Bandera. Ora cu e Festival cuminsa pa 6:00 pm, lo tin Himno di Aruba canta pa Tipico Colegio, cu ta sigui cu un warm-up song. Despues lo bin cu cancion di Ghislaine LeGrand (ganadora di 2023). Lo bay rindi homenahe tambe na baluartenan e anochi ey.
Festival pa Adulto lo tin 16 agrupacion participando, y lo tin 18 composicion propio ta competi. Corda cu esaki ta un festival di compositor, pues e compositor ta esun cu ta gana e premio mas grandi. E Festival pa Adulto ta planea pa caba 11:00 pm.
Rayanne Hernandez di Comision Promove Cultura a indica cu riba Diasabra, nan tin un total di 30 participante den diferente categoria di edad, e.o. 4=6 aña, 7-9 aña, 10-12 aña, y 13-17 aña. Nan lo wordo acompaña pa 10 grupo musical.
Comision Promove Cultura ta satisfecho di ta ricibi sosten di Comision Celebracion Dianan Nacional, y e logistica di tur e evento pa trece un show magistral den dos anochi, lo ta great pa Aruba. Hernandez a gradici Setar NV pa ta sostene e proyectonan di cultura di Aruba.
Di parti di Setar NV, nan ta desea tur agrupacion musical y cantantenan hopi exito y nos ta invita pueblo di Aruba completo pa bishita e festival y gosa di nos dushi musica y hunto celebra nos Himno y Bandera.
