Local News

“Dialogo cu Raad van State ta importante pa futuro di Aruba den Reino”

18 November 2026
This content originally appeared on Diario Online.
Promote your business with NAN

Parlamentario Jennifer Arends-Reyes:

ORANJESTAD (AAN): Parlamentario y lider di fraccion di AVP, Jennifer Arends-Reyes, ta enfatisa e importancia di dialogo institucional, respet mutuo y reconocemento di e autonomia di Aruba den relacionnan dentro di Reino Hulandes. Esaki a forma parti di su mensahe durante un encuentro di conocemento cu Sybrand van Haersma Buma, vice-presidente di Raad van State, kende ta di bishita na Aruba y a reuni cu vice-presidente di Parlamento y lidernan di fraccion.

Arends-Reyes, kende tambe ta ocupa e funcion di presidente di Comision di Asuntonan di Reino y Relacionnan Exterior (CKABB) di Parlamento, a destaca e importancia di mantene un contacto directo y constructivo cu e institucionnan di Reino. Segun e parlamentario, encuentronan di e naturalesa aki ta brinda un oportunidad valioso pa intercambia perspectivanan, fortalece comprension mutuo y garantisacu e realidad y interesnan di Aruba ta haya e atencion necesario den dialogonan a nivel di Reino.

“Un encuentro asina ta importante, pasobra ta duna nos oportunidad pa conoce otro miho y comparti e perspectiva di Aruba. Den Reino, cada pais tin su propio realidad, necesidad y responsabilidad. P'esey, dialogo mester ta basa riba respet mutuo, comprension y reconocemento di e circunstancianan particular di cada pais,” Arends-Reyes a declara.

Durante e encuentro, atencion a bayna e relacion institucional entre Aruba y Reino Hulandes, incluyendo e importancia di comunicacion y cooperacion entre e diferente instancia cu tin un responsabilidad den e funcionamento di Reino.

Den e contexto aki, Arends-Reyes ta considera fundamental cu e voz di Aruba no solamente wordo scucha, sino cu su realidad social, economico y institucional tambe wordo tuma na cuenta den deliberacionnan y procesonan di toma di decision cu por tin consecuencia pa e pais.

Como presidente di CKABB, Arends-Reyes a subraya e responsabilidad di Parlamento den e ehecucion di control democratico, evaluacion di legislacion y supervision di politicapublico. E ta considera cu un miho comprension di e funcionamento di e institucionnan di Reino ta contribui na un ehecucion mas efectivo di e responsabilidadnan parlamentario.

Raad van State ta un organo importante den e structura institucional di Reino, cu entre otro ta brinda conseho tocante legislacion y gobernacion. Su vice-presidente, Sybrand van Haersma Buma, ta encabeza e Afdelingadvisering, cu tin un papel importante den e proceso di evaluacion y asesoramento legislativo.

Segun Arends-Reyes, contacto directo cu representantenan di e institucion aki ta contribui na un miho entendemento di e proceduranan y mecanismonan institucional, pero tambe ta crea espacio pa pone e perspectivanan di Aruba dilanti.

Arends-Reyes ta enfatisa cu un relacion solido dentro di Reino mester ta fundamenta riba cooperacion, confianza y respet pa e posicion constitucional di cada pais. Den su opinion, un dialogo constructivo ta exigi cu e diferente partinan no solamente reconoce nan responsabilidadnan comun, sino tambe e particularidadnan y desafionancu cada pais ta enfrenta.

“Nos mester sigui traha riba un Reino den cual cooperacion ta bay man den man cu respet pa autonomia y identidad di cada pais. Aruba tin su propio voz, su propio realidad y su propio responsabilidad. E tipo di dialogo aki ta un paso valioso pa fortalece comprension mutuo y contribuina un relacion mas constructivo pa futuro,” Arends-Reyes a conclui.