Desvelo di e borchi di construccion di e edificio nobo pa Departamento di Aduana Aruba

ORANJESTAD (AAN):  Diamars a tuma luga desvelo di e borchi di construccion di e edificio nobo pa Departamento di Aduana Aruba.

E acto aki ta marca un logro importante den e proceso di modernisacion y fortalecemento institucional di Aduana, y ta confirma e compromiso continuo cu profesionalismo y mehor servicio na beneficio di e economia di Aruba. 

E edificio nobo lo contribui directamente na bienestar di empleadonan y lo eleva e calidad di servicio cu Aduana ta brinda na sociedad. Durante e encuentro social, tambe a tuma un momento pa reflexiona riba e progreso y metanan cu a logra durante aña 2025 y pa comparti e expectativa y vision pa 2026, cu enfoke riba continuidad, eficiencia y desaroyo organisacional. 

E proyecto di construccion di e edificio nobo ta representa un paso visibel den e crecemento y modernisacion di Aduana, y ta subraya e importancia di inversion den infrastructura publico como parti di un aparato gubernamental fuerte y orienta riba futuro.