Landspakket a exigi hopi trabao di hopi hende cu a dedica nan mes pa por a duna contenido na e palabracionnan cu Hulanda

The content originally appeared on: Diario

ORANJESTAD (AAN): Prome Minister Evelyn Wever-Croes, durante un conferencia di prensa dialuna mainta a referi na e topico di e Reforma fiscal.


El a bisa cu esaki ta un di e elementonan den e landspakket. A firma e landspakket 13 di november 2020, pues ya un aña a pasa.

Prome Minister a splica cu prome cu a firma e landspakket a tuma tempo prome cu a firma esaki, pa percura cu por cumpli cu e condicionnan a pesar di tur e presion/ necesidad financiero.

El a agrega cu 2021 tabata un aña no facil. Prome cu a yega na firma e Landspakket dia 13 di November aña pasa a tuma tempo pa negocia un bon areglo. E prome propuesta cu Hulanda a duna na Juni no por a acepta y pesey a sinta na mesa y negocia di Juni te na November.

Den e proceso Gobierno di Aruba a haya hopi presion pa “a firma pa caba. Presion interno den e gremionan cu ta bisa firma pa caba pasobra nos mester di e placa”, a señala.

E mandatario a señala cu pa dos motibo no a core firma. E prome motibo tabata pasobra kier ta sigur cu ta saca un trato husto ya cu no mester acepta tur inhusticia. Pesey a negocia y na November tabata tin un propuesta riba mesa cu por biba cu ne.

E di dos motibo pakico no a core firma ta pasobra si firma ta pasobra ta bay cumpli cu ne. Na Juni, no tabata sigur cu ta bay cumpli cu ne, a remarca.

Pesey mester a tuma tempo pa haci un pakete di dje cu si por cumpli cu ne.

Landspakket pa loke ta e aña tras di lomba a exigi hopi trabao di hopi hende cu a dedica nan mes pa por a duna contenido na e palabracionnan.

E Landspakket ta contene 8 area di cual e 4 prome ta areanan similar.

E prome ta e tema di e  Maneho financiero di gobierno (Financieel Beheer). E di dos tema ta e gastonan y efectividad di e sector publico (Kosten en Effectiviteit publieke sector). E di tres ta impuestonan (belastingen) y e di cuatro ta e sector financiero (Financiële sector).

Premier Wever-Croes a bisa cu e cuatro areanan aki ta e areanan financiero cu ta wordo traha riba dje den e Landspakket.

Pa cu esaki diferente estudio a wordo haci con pa tin un mihor maneho financiero, baha gastonan, traha mas eficiente, entre otro, a duna di conoce.

E di cinco area ta reformanan economico (Economische hervormingen) unda tambe a haci estudionan pa mira kico mester haci pa por desaroya e economia mas lihe y e rapport ta kedando cla den e dianan aki, a bisa.

Tema F ta cuido (zorg) y akinan tambe tin varios deliberacion tumando lugar. E estudio n ta cla ainda. Ta bay busca un professor hulandes pa yuda pa asina por garantisa calidad di cuido.

Tema G ta enseñansa (onderwijs). Akinan tambe a haci estudionan door di Inspectie Onderwijs di Aruba y di Hulanda. E rapport ta den keda cla pa wordo presenta na stakeholders.

Tema H ta estado di derecho (versterken rechtsstaat).

Riba cada un di e areanan aki a traha un aña caba pa por tin mehoracion y pa hunto delinea kico ta e mihor pasonan pa Aruba tuma, Premier Wever-Croes a declara.