The content originally appeared on:
Diario
HOED ta treciendo un cambio riba esey
Dr. Joel Rajnherc ta hopi satisfecho con ya caba HOED ta funcionando
ORANJESTAD (AAN): Manera cu DIARIO a trece dilanti caba na comienso di luna, ImSan awor a habri un seccion pa Docter di Cas, cu yama “HOED”. E Departamento aki nifica “Huisartsen Onder Één Dak”. E informe a bay acompaña cu e anuncio cu 5 Docter di cas lo mehora accesibilidad cu cuido y servicio
HOED lo bay yuda fortifica e prome liña di cuido na Aruba. E ocasion special aki ta significa un paso padilanti den ministerio di salud su compromiso pa mehora e calidad di servicio di cuido di salud disponibel ariba nos pais. Principalmente pueblo Pariba di Brug lo bay beneficia di esaki.
Den un entrevista cu Dr. Joel Rajnherc, director di ImSan, el a splica cu den ultimo añanan a bin nota cu tin menos interes pa Docternan di Cas bin habri nan consultorio na San Nicolas, como cu aparentemente e no tabata atractivo pa Docternan di Cas haci esey. Pesey mes, Dr. Rajnherc ta extremadamente agradeci pa esnan cu ta trahando eynan y ta haciendo magnifico trabao pa pueblo.
Pero toch ImSan tabata nota cu e Docternan di Cas aki tin di wordo reforza, como cu ta importante pa un pashent por bati porta na un Docter di Cas, prome cu nan recuri pa bay na Servicio di Emergencia of yega na Specialista. E funcion di e Docter di Cas ta tambe e “prome liña” di e brug inicial pa henter e sistema di cuido di salud.
Dr. Rajnherc ta haya importante cu e prome liña ta keda accesibel posible pa asina den futuro por sostene e sistema di cuido. Riba indicacion di AZV, a check si acaso ImSan lo por habri tambe un solo espacio pa varios Docter di Cas traha, hunto cu nan asistentenan, POH, pa asina “alivia” un tiki e extra necesidad cu Pariba di Brug y San Nicolas tin mester.
Tambe tin di corda cu Pariba di Brug tin un poblacion creciendo di mas grandi di edad, y esey ta trece mas presion riba e sistema di cuido, y esaki ta pone cu mester di mas Docter di Cas. Loke ImSan ta trata di haci ta pa amplia e necesidad ey na San Nicolas.
Originalmente nan tabata busca pa habri un espacio pafo di e edificio di ImSan. Pero na San Nicolas ultimo tempo tur tereno y lugar a bira asina caro, y no tabatin un lugar cla pa huur pa habri un espacio ‘HOED’ pa 4 of 5 Docternan di Cas.
“Pesey nos a haci e uso di e ultimo meternan cuadra cu tabatin na ImSan, pa diseña y ehecuta e espacio nobo di HOED, y ta wordo maneha door di un manager y tambe door di Docternan di Cas cu ta eyden,” Dr. Rajnherc a bisa. Pues el a enfatisa cu ImSan lo no bay dicidi pa nan, con e mediconan eyden tin di bay traha!
Unico cu ImSan lo kier ta pa e trabao cu ta wordo haci eyden, cu ta duna e mihor calidad di servicio cu tin, y tur esaki bao di e capa di acreditacion JCI (Joint Commission International) cu a ricibi na Juni 2023. Pesey a bay busca cinco Docter di Cas.
Ya a cuminza cu 3 Docter di Cas, y dos extra ta casi cla pa start tambe. Tambe tin 2 Asistente di Docter trahando eynan, y un experto di POH. Tambe a pone un enfermera cu hopi experiencia, pues ora bo ta den HOED, tin un departamento cu hopi experiencia y tin personal cu por atende cualkier problema acudi cu ta tuma lugar.
E ubicacion di HOED ta pone cu otro personal experto di ImSan mes por core yega eynan si acaso tin un caso di emergencia cu presenta.
Dr. Rajnherc en general ta hopi satisfecho cu a logra pone HOED bao di dak di ImSan mes, apesar cu nan sa cu e ‘prome liña’ no ta algo cu bo kier introduci den un Hospital. Pero kizas esaki ta e prome biaha di funcion hybrid unda por complace pashentnan di prome liña, evitando asina cu tur hende ta bay Servicio di Emergencia prome.
