Delegacion di Aruba lo participa den proximo IPKO na Hulanda

Parlamentario Jennifer Arends-Reyes:

ORANJESTAD (AAN): Den calidad di Presidente di e Comision di Reino y Relacionnan Exterior di Parlamento di Aruba, Sra Jennifer Arends-Reyes ta anuncia cu un delegacion oficial di Aruba lo participa den e proximo encuentro di IPKO (Interparlementair Koninkrijksoverleg) cu lo wordo teni na Hulanda comienso di juni.

E IPKO ta un plataforma importante unda e delegacion parlamentario di Aruba, Curaçao, Sint Maarten y Hulanda ta reuni pa discuti temanan cu ta toca e futuro di e Reino Hulandes y pa fortalece e cooperacion entre e paisnan den e Reino.

Durante e encuentro aki, delegacionnan ta intercambia idea, comparti preocupacionnan, comparti ‘best practices’ y traha riba solucionnan comun tocante asunto di interes general, manera sostenibilidad, economia, educacion, seguridad y relacionan internacional.

Sra Jennifer Arends-Reyes a enfatisa cu e participacion di Aruba den IPKO ta esencial pa asina Aruba por sigui resona su voz y defende e interes di nos pueblo. “IPKO ta un momento importante pa Aruba, pa nos por reafirma e necesidad di un relacion di respet, igualdad y cooperacion real den e Reino. Aruba no ta solamente un partner, Aruba ta un pais cu su propio realidad y prioridadnan cu mester wordo tuma na cuenta,” segun Arends-Reyes.

Segun e Presidente di Comision, e delegacion Arubiano lo enfoca riba temanan manera igualdad den e Reino, e implementacion di acuerdonan y reformanan cu ta impacta Aruba, y tambe e necesidad pa un enfoque realistico den e cooperacion financiero y institucional.

E delegacion lo hiba tambe preocupacionnan di pueblo Arubiano riba mesa y comparti pensamentonan riba diferente tema pa garantisa cu decisionnan cu ta wordo tuma na nivel di Reino ta sigui refleha e interes di Aruba.

Arends-Reyes a agrega cu e IPKO tambe ta un oportunidad pa fortalece relacionnan diplomatico cu parlamentarionan di Reino, y pa crea un dialogo mas directo y constructivo.

E delegacion lo wordo representa  pa miembronan di Parlamento di tur fraccion, cu lo representa e prioridadnan di Aruba den e reunionnan oficial. E comision a reuni y ta preparando pa e encuentro. Alavez ta planeando diferente bishita di trabou cu tin que haber cu entre otro studiantenan na Hulanda y lazonan diplomatico na Hulanda y union Europeo cu ayudo di nos Minister Plenipotenciario y Kabinet di Aruba.

E comision di Parlamento ta mira e participacion den IPKO como un paso importante pa fortalece e rol di Aruba den e Reino, y pa sigui lucha pa un futuro mas stabil, husto y sostenibel pa nos pais segun Jennifer Arends-Reyes.