The content originally appeared on:
Diario
ORANJESTAD (AAN): Tabata Diaranson mainta banda di 8:21 am, cu e compania di electricidad NV Elmar a detecta un storing cu un biaha mas a benta gran parti di Oranjestad y vecindario afo di e grid.
Segun NV Elmar, e storing a laga areanan di Ponton, Oranjestad, e.o. area cerca di Pro Catedral San Francisco y Servicio Postal, Belgiestraat, y algun area di Dakota sin coriente.
Esaki a socede net ora cu desde 7:30 am, pa scolnan MAVO den vecindario tabatin Examen di Biologie cu tin un duracion di 2 ora y mey. Esnan cu ta haya examen ta haci esaki den un sala grandi full airco na e scolnan.
Debi cu coriente a bay, esaki a afecta mesora e examennan, como cu e alumnonan a haya nan distrai cu scuridad den e lokaalnan, y como cu tin hopi studiante den un lokaal, esaki ta bira calor mesora y lo a haya nan obliga di habri porta y bentana, y esaki a trece cune extra molester di sonido di trafico eybanda, y demas alumonan di otro klasnan riba tereno di scol.
Banda di 8:45 am, NV Elmar a isola e problema y a duna otro area di Playa coriente bek. Di un forma of otro, Elmar a haya sa cu scolnan tin examen, y pa 9:11 am nan a dicidi na duna prioridad na e scolnan, y a core duna coriente na area di De La Sallestraat, oficina di DIMP, y parti di Solito.
Pa 10:40 am, a duna coriente bek na area di Madiki, Ponton y vecindario. Como 15 minuut despues, Elmar a duna tur hende coriente bek.
Diaranson mainta, Elmar no a duna ningun motibo pakico coriente a bay, y a djis bisa cu ta ‘storing’. E falta di transparencia aki a pone varios instancia reacciona, incluyendo Parlamento, Comerciantenan Uni, y Asociacion ATIA.
Tur tabata disgusta cu mesun areanan ta bolbe perde coriente, y esaki diripiente a yega te na atencion di Ministro cu a core yama reunion cu esnan concerni.
