Comerciante local asombra cu tin di paga suma astronomico pa container a keda riba waf

Siendo cu por a pone mercancia den bond cerca Aduana pa haci container bashi

• Negoshi chikito ta haya esaki un falta di informacion y mala fe di compania 

ORANJESTAD (AAN): Un comerciante local cu tin un negoshi chikito (conoci como ‘small business’) awor ta man na cabez, ora cu cierto situacion a presenta cu yegada di container di carga pa su negoshi, y situacion cu a sali for di man y cobranza a aumenta exponencialmente pa por saca e carga awor.

   E negoshi chikito local aki no por a saca e container na tempo for di Waf pa motibo personal.  Pero el a ser mal informa, y awor tin di paga hopi mas placa pa e asina yama ‘demurrage’. (Demurrage ta un cobranza cu ta ser cobra ora cu un container ta keda riba waf mucho mas largo cu e ‘tempo gratis’ cu e ta ricibi.  E ta esencialmente un cobranza pa e retrazo, y ta wordo imponi pa asina encurasha importadornan pa busca containernan rapidamente, y regresa nan bek na tempo).

   Den e caso aki, awor e cobranza di ‘demurrage’ a bira un suma cu ta double di e impuesto di importacion.  E ta un enorme perdida pues pa e comerciante.

   Pa colmo, clientenan local di e comerciante ta wardando riba e mercancia (ta temporada peak di aña caba).  Segun e comerciante, nan tin pedidonan di mas di 20.000 Florin pa entrega, y compania di shipping na Aruba a actua di mala fe.

   A exigi pa paga e ‘demurrage’ y henter e invoice den dos siman, peso e compania di shipping na Aruba no kier a coopera cu esaki.  Despues cu e comerciante a pidi pa por fabor laga nan paga e cobranza di ‘demurrage’ pa stop e gasto astronomico, y aki tampoco e compania di atende carga no kier a coopera.

   Comerciante a caba di nota cu e compania di shipping a paga impuesto di importacion di 6.594,40 Florin caba y esey ta algo cu e compania di shipping no a informa e comerciante, pero tampoco kier yuda nan como cliente.  Ta haya raro cu compania local di shipping, envez di traha pa busca solucion cu cliente, ta tuma postura di perhudica e comerciante.

   Y awor e compania local di shipping ta manda invoice di 10.000 Florin na demurrage pa un compania stranhero multi-nacional Perez & Cia.  Pues a cobra suma di $100 pa cada dia cu container a keda na Astec.

   Loke e compania di shipping local no a informa e cliente nunca ta, cu por a saca e cargo completo hink’e cu un documento T-1, haci e container bashi pa e por a bay bek.  Pues nan no ta compronde di con e shipping company local no por a hinca e carga den ‘bond’ y manda e container bek.  Ta haya raro cu e invoice di Perez & Cia. no ta specifica exactamente e cobranza di esaki.

   E comerciante ta haya cu tur esaki ta falta di ‘goodwill’ y falta di informa nan tocante e posibilidad di T-1 y Bond pa evita e suma astronomico.  Resultado ta cu awe e demurrage a bira 100 mil Florin, cu ta doble e impuesto di importacion riba e mercancia.

   E comerciante ta haya raro cu esaki ta socede cu un cliente di e compania di shipping ya pa mas di 25 aña.