The content originally appeared on:
Diario
Patrick Geerman ta splica:
ORANJESTAD (AAN) – Patrick Geerman ta e promotor di e evento “Christmas in July” cu lo tuma lugar Diadomingo 28 awo na Hadrey di Faust na San Nicolas.
E evento aki ta un tipo di mercado di purga y esaki el a mire na Merca dos aña pasa, unda hendenan por bin bende nan articulonan di Pasco di aña pasa, manera balanan cora of blou, y e aña aki bo por busca di otro color, manera biña por ehemplo. Asina bo tin e placa pa na October, ora e articulonan nobo sali, bo por cumpra nan.
Asina Patrick a splica den entrevista cu DIARIO. El a bisa cu hopi hende ta uza articulonan di Pasco pa solamente un siman. E ora nan por bin bende nan, y na October cumpra nobo, el a reitera.
El a agrega cu aña 2024 ta perfecto pa bin cu e proyecto aki. Ta bay tin diferente banner y tent cu benta di cuminda, artesania, areglonan di Pasco, etc., pa asina drenta den ambiente di Pasco.
E evento aki lo cuminza pa 6’or di atardi te cu 11’or di anochi. Patrick a bisa cu loke nan kier ta visualiza y trece dilanti cu Pasco ta un temporada di famia, y e evento lo tuma lugar den un lugar na aire liber, grandi unda bo por cana rond y sinta manera famia, sinta come, wak tentnan di artesania, y scucha musica di ambiente di Pasco.
